بقلم آيه شعراوي: زعلت ؟! طيب معلش

 السؤال اللي بيبادر ذهننا دايما ليه الشخص دا حططني في دماغه كده ليه النقد للبسي لشكلي لأولادي لأسلوب حياتي .. لازم نفهم أن الشخص اللي بينقدك كل ما يشوفك وعايز يضايقك بالكلام بيغير منك وعنده نقص داخلي .. و دا اللي بيأكده دكاترة علم النفس اللي أكدت : أن الشخص الذي ينتقد ويهاجم الآخرين بطريقة لاذعة ويقوم بالتقليل من إمكانياتهم ، هو شخص يفعل ذلك لأن لديه نوع من أنواع النقص الداخلي ، فيحدث إسقاط علي الآخرين من خلال استخدام حيل دفاعية ضد الأشخاص ، حتي يظهر سلبيات غير حقيقية في الأشخاص الذي يقوم بانتقادهم لشعوره بالنقص بجانبهم" .. يعني المشكلة مش فيك خالص الموضوع كله عندهم .. فاوعي ثقتك في نفسك تقل أو تخلي حد يخليك طول الوقت في وضع الدفاع عن النفس وتبرير تصرفاتك .. 

طيب نتعامل ازاي مع الشخصية اللي كل ما تشوفنا بتزعجنا بكلامها خبراء علم النفس أغلبية الآراء شايفة أنك يا تتجاهل لو أنت مش مضطر تتعامل معاه لكن لو مضطر تحاول تهدي من حدية الشخص وتعامله معامله حسنه علشان يتكسف ويبتدي يغير اسلوبه معاك وفي آراء تانيه اللي أنا شخصيًا شيفاها فعاله أكتر أنك تتجاهل بردو بس بعد ما "تفهمه أنه تجاوز" ويعرف أن تصرفاته مش مقبوله ده لو مش مضطر تتعامل معاه لكن لو مضطر لازم تتعامل معاه بذكاء و توصله أنك فاهم كويس أنه قاصد يضايقك بس انت مش هتضايق علشان كلامه مالوش أي قيمة عندك ، اعمل ده بهزار وبراعة وبهدوء اعصاب طالما الغلط والتجاوز واضح وصريح ومستمر .. متقولش صعب … أنا مش متعود أرد .. لا معلش اتعود احنا في زمن لازم تعرف تتعامل مع كل الاشكال حتي لو مش شبهك أبسط الامور أنت عارف كويس هو لما يشوفك هيعلق علي إيه جهز ردك ووقف أي حد متعمد الإساءة عند حده بمنتهي الأدب والأريحية .. 

ولو أنت الشخص اللي عنده إصرار يأذي اللي حواليه بلسانه تحت بند الهزار أو أن ده رأيي و أصل أنا صريح وأصل أنا علي طبيعتي أعرف أن عندك مشكله دور علي جذورها وحلها لأنك للأسف بتبقي مكشوف اوي للي حواليك ووجودك مؤذي نفسيا فالموضوع محتاج منك شغل ومجاهده للسلوك السيء اللي بيأذي غيرك ..

يقول الرسول صلى الله عليه وسلم: «إن شر الناس عند الله منزلة يوم القيامة من تركه الناس اتقاء شره».

وحذرنا ربنا في كتابه فقال تعالى: (ما يلفظ من قول إلا لديه رقيب عتيد) . يعني متفتكرش الكلمه بتخرج منك وناسي أنك هتتحاسب عليها وهتتحاسب علي تأثيرها في نفس اللي قدامك.