مروة عبدالمنعم: مؤمنة إني هدخل الجنة مش بالحجاب

حلت الفنانة مروة عبدالمنعم ضيفا في برنامج "البيه والهانم" والذي تقدمه الإعلامية نورين شحاتة، والإعلامي ممدوح الشناوي على قناة "القاهرة والناس" وتحدثت عن علاقتها بالله عز وجل، وعن عدم ارتدائها الحجاب، على الرغم من ارتداء ابنتها له في سن صغيره.

عبرت مروة عبد المنعم عن اقتناعها بالحجاب بشكل تام، حيث قالت: "جات لي فكرة الحجاب في نفس سن بنتي وكنت في أولى إعدادي وقلت لماما قالت لي لما تكبري خدي القرار، كنت ساعتها عايشة روحانيات الحجاب خاصة إني كنت عايشة في السعودية".

وتابعت مروة عبد المنعم: "مقتنعة جدًا بالحجاب وربنا عالم أنا ليه مش محجبة، وده حساب بيني وبين ربنا، وفخورة جدًا ببنتي وأتمنى ربنا يثبتها على الحجاب وسعيدة بالقرار اللي خدته، ولو جه عليها فترة وزهقت وخدت قرار تخلع الحجاب مش هقف ضدها".

وعن الانتقادات التي تعرضت لها مروة عبد المنعم بعد ارتداء ابنتها للحجاب، وهي مازالت بدون حجاب قالت: "أنا بيني وبين ربنا عمار كبير جدًا، وعندي علاقة خاصة بيني وبين ربنا ما يصحش أني أقولها لأني بحبها، وواثقة في ربنا وكرمه وحبه ليا وواثقة أنه بيحبني جدًا وبيبعت لي رسايل كتير جدًا وبيكلمني كتير جدًا.

وتابعت: "مؤمنة أن ربنا بيكلمنا في كل لحظة ومن يستطيع أن يقرأ رسايل الله مش أي حد أنا بقرأ رسايل ربنا ليا، ومؤمنة إني في الجنة مش بالشعر نهائي، ومحدش عارف فيه إيه بيني وبين ربنا، وأنا أخلاقيًا الناس كلها عارفة أخلاقياتي ومش محتاجة أني أتكلم عنها ودينيًا ربنا وحده بس اللي عارف بيني وبينه إيه".

كما تحدثت حور ابنة مروة عبد المنعم خلال اللقاء عن تفاصيل ارتدائها الحجاب قائلة: "مفيش حد من صحابي محجب يمكن اتنين تلاتة، وقبلها بيوم صحابي كانوا بيتكلموا في موضوع الحجاب وقلت لهم إني مش بفكر فيه وتاني يوم فاجئتهم، وكل الناس مقتنعة إني هقلع الحجاب في الصيف لكني مش هعمل كده".