نصائح سنة أولى زواج: المشاكل تتحل بدون طرف تالت

تعد السنة الأولي من الزواج من السنوات التي يخاف منها الكثير من النساء، لأنه في اعتقادهن أن تلك السنة تشهد الكثير من المشكلات والمخاوف، حيث تحاول الزوجة التعرف على طبع زوجها بشكل أكبر، وكذلك الزوج، فهذا الرباط هو رباط مقدس بين طرفين، والنجاح في سنة أولي زواج مهم لنجاح علاقة الزواج فيما، وتقدم «هير نيوز» من واقع صفحات السوشيال ميديا نصائح للنساء لعبور سنة أولى زواج بنجاح.

يوجد الكثير من النصائح لتخطي مشكلات الزواج، وخصوصا السنة الأولى، والتي تعد الأخطر والأصعب، لعدة أسباب مثل تغيير نمط الحياة والتحول من حياة العزوبية إلى حياة الزفاف، واختلاف الطباع وأسلوب الحياة من شخص لآخر، ولتخطي تلك المشكلات، هناك مجموعة من الفتيات نصائح لتخطي تلك العقبات. 

حيث تقول أسماء كمال: "مهما حصل متطلعيش برة بيتك أغضبي في أوضة تانية بس متسيبيش البيت لأن رجلك بتأخد على الموضوع وهو بيبقى عارف آخرك، موضوع أنك تغضبي عند أهلك ده بالنسبة ليه حاجة كبيره متطلعيش أسرارك بره". 

بينما نصحت سلمى شكري: "الجواز ده أحلى حاجة في الدنيا وفي مشاكل أكيد زيه زي أي حاجة تانية بس الأهم أنكم تعرفوا تعدوا أي مشكلة تقف قصدكم و أكتر حاجة تخلي الجواز ناجح اللي ما بينكم مفيش تالت يعرفه والأهم من كل ده بقي يكون معاكي حد بتحبي تعرفي و تتقبلي تعدي أي حاجة عشانه". 

وتعد الصراحة وتقبل اختلاف الطباع من أهم النصائح، لتخطي السنة الأولى من الزواج، فالصراحة مهمة في العلاقات الزوجية، لتخطي المشكلات حين وقوعها، ولا تتراكم وتؤدي إلى مشكلة أكبر، كما أن تقبل اختلاف الطباع مهم للتعرف على طباع كل شخص، ومحاولة التغيير من السلوكيات غير المحببة في الشخص. 

حيث تقول إيمان أشرف: "الجواز زيه زي أي حاجة ليها مميزات وفيها مشاكل أكيد استمتعي بالحلو عشان تقدري تعدي الوحش لأنها شراكة متقلش عليا ولا أتقل وأضغط عليك في الكام يوم اللي عايشينهم، ومتطلعيش مشاكلك بره بيتك عشان متكبرش". 

بينما كان لندى الشرنوبي رأي يتعلق أكثر بضرورة تخطي المشكلات الصغيرة: "اللي يخلي الجواز يدوم أن اللي جوه البيت ميخرجش بره البيت وأن كل واحد فيكو يكبر دماغه من المشاكل والقال والقيل، اتجوزتي واتقفل عليكي باب حافظي علي كل حاجة بتتقال و بتحصل جواه ومتخرجهاش بره و فهمي جوزك كمان كده".