صفاء أبو السعود باكية: نتمنى من رؤساء العالم يتحدوا

دخلت الإعلامية صفاء أبو السعود في موجة بكاء شديدة، أثناء حديثها عن الأوضاع في غزة، وما يتعرض له الشعب الفلسطيني من قصف متواصل، أدى إلى سقوط الألاف من القتلى والمصابين والجرحى ما بين نساء وأطفال وشباب وشيوخ.

تحدثت الإعلامية صفاء أبو السعود خلال مداخلة هاتفية على قناة DMC قائلة: "بقالي أكتر من 4 أيام دموعي لا تتوقف، لأن النيران في كل مكان ونار الحرب في غمار البحار نفسها وفي والهوا، والأرض كلها ملتهبة بالنيران، وده شيء فوق الاحتمال والواحد مش مصدق اللي بيحصل، لأن مفيش دين من الأديان بيقول حلال قتل الروح اللي المفروض لا تقتل إلا بإذن ربها فإزاي بيقتلوا الأطفال والأرواح".

وتابعت صفاء أبو السعود عن قتل الأطفال داخل غزة قائلة: "موجع وفظيع ومدمر للنفس البشرية والواحد مش قادر يستحمل، وأكيد ربنا موجود يحميهم والواحد بيدعي ربنا يسكن الطوفان الفظيع ده حقنا للدماء، لأن القلوب أصبحت أشد قسوة من الصخور وعندهم غفلة وغرور، ولازم القتل يتوقف بأي طريقة".

وأضافت: "لازم يسمحوا للمعونات اللي جات تنقذ ناس معندهمش أكل ولا مياه ولا نور ولا كهرباء ولا شيء، ده شيء يوجع القلب فعلًا أنا مش ببطل بكا من المناظر اللي بشوفها طول الليل والنهار ومش بعرف أنام، وكل يوم بيطلع عليا الصبح بشوف الحاجات دي".

وأردفت: "كتر خير مصر والسيسي أنه بعت الدعم ولكنه لم يصل بسبب الحجب والمعوقات اللي منعت دخول المعونة والدعم، ونتمنى من رؤساء وملوك العالم يتحدوا علشان يحلوا هذه القضية ونحن لا نملك إلا الدعاء".

واستكملت: " كل مصر وكل العرب وكل الناس في أنحاء العالم حتى في منطقة اليهود متعاطفين؛ لأن محدش يحب يشوف شخص بيقتل بلا سبب، ودي مش منطقة حروب دي ناس قاعدة في بيوتها، وإزاي يضربوا مستشفى ويموتوا فيها مريض جاي يتعالج لا يستطيع الدفاع عن نفسه ولا يحمي نفسه، ومفيش دين من الأديان يحث على قتل الأبرياء ده شيء قاتل وموجع، وكتر خير مصر وغيرها من الدول اللي دخلت تساعد لكن المساعدة ما وصلتش لأصحابها، حرام قتل الناس".

اقرأ أيضا..