إسعاد يونس: أنا كنت أهم واحدة في الإذاعة يوم 6 أكتوبر 1973 (فيديو)

تحدثت الإعلامية والفنانة إسعاد يونس خلال كلمتها في الندوة التثقيفية للقوات المسلحة بمناسبة مرور 50 عامًا على نصر أكتوبر المجيد بحضور الرئيس عبد الفتاح السيسي، عن علاقة الجيش والشعب بالإضافة إلى وفاة والدها في حرب أكتوبر وكذلك تحدثت عن كواليس يوم النصر داخل مبنى الإزاعة والتليفزيون.

تحدثت إسعاد يونس عن علاقة الجيش والشعب حيث قالت: إن الجيش والشعب مثل العاشق والمعشوق، جميعنا داخل بعض وأولاد بعض وأحفاد بعض وأعمام بعض، لافتة إلى أن الشعب كان طول الوقت يمتلك الأمل ولم ييأس بعد 1967.

كما تحدثت إسعاد يونس عن والدها حيث قالت: أنا بنت ظابط طيار حربي كنت بقول عليه قمر الزمان لأنه كان بيمثل لي كل معاني الفروسية والنبل والشجاعة والصدق والأمانة والبسالة، وكان ملخص المؤسسة العسكرية اللي كان بيشرف بالانتماء ليها، اتوفى سنة 1965 وكان شاب صغير وأنا كنت طفلة صغيرة.

 وتابعت: من وقتها فيه حلم بيجي في دماغي كل يوم وهيفضل يجي في دماغي يقظة ونوم لآخر العمر، وهو أني أكون موجودة في مكان وألاقي أبويا داخل عليا فاطنطط وأفرح وراسي تخبط في السقف وأقول بابا جه، لأن بابا جه كان ليها معنى مزدوج لأنه كان طيار يعني راجع منصور وسالم، وأنا عارفة أن الحلم ده عمره ما هيتحقق في الواقع.

تحدثت إسعاد يونس عن ما حدث يوم 6 أكتوبر حيث قالت: أنا كنت في مربع مهم في إذاعة الشرق الأوسط وفي اليوم ده كنا 10 رمضان كان بقالنا 9 أيام بنذيع برامجنا عادي جدًا، وفي الوقت ده كنا بنذيع مسلسل "أرجوك لا تفهمني بسرعة" وكان ناجح جدًا

وتابعت: يوم 6 أكتوبر 10 رمضان الساعة 2 الظهر، اتقال بيان عسكري قلب الدنيا ورج المبنى ورج مصر كلها زلزال سعيد وزلزال من الفرحة والزغاريد، زي ما بيقولوا الواحد نفسه ردت ليه.. بسرعة ناس بتتحرك وبيانات بتتحضر وبرامج بتتغير.

وتابع إسعاد يونس: "أنا كنت أهم واحدة في الإذاعة اليوم ده مش لأني مذيعة مهمة ومخضرمة ولا هقرأ بيان عسكري ولا هغير نشرة، لأني كنت مرمطون الإذاعة بيعملوا فيا اللي هما عاوزينه، اطلعي وانزلي الأرضي هاتي مكانية تسجيل اطلعي الدور التاني وبلغي أن فيه خريطة بتتغير اطلعي استديو الموسيقى والغناء، اطلع الاقي الدنيا مقلوبة كل الاستراحات حوالين الاستديو مليانة نجوم عبد الحليم حافظ وشادية وعلي إسماعيل ونبيلة قنديل وصلاح جاهين والأبنودي ومحمد حمزة كل الناس دي جم جري يعكسوا فرحة الشعب والنصر اللي حصل لنا للناس كلها".

كما تحدثت إسعاد يونس عن ما شعرت به في 2013 حيث قالت: "نفس الإحساس ده جالي يوم 3 يوليو 2013 وإحنا داخلين الميدان كنت على كوبري أبو العلا وفجأة السما اتملت بالطيران الحربي بيرمي علينا بونبوني وشوكلاتة وورد وبلونات وأنا باطنطط من الفرحة كأني عندي 14 سنة وبقول بابا جه أخيرا وأتمنى أيامنا كلها تكون بالجمال ده، لأن النصر اللي بنعيشه النهارده عمره ما هيقدم هيفضل لحد اللحظة والعمر اللي جاي بيسبب لي حالة بابا جه".

وفي نهاية حديثها طالبت إسعاد يونس بتوثيق جميع الأحداث حتى ترى الأجيال الجديدة ما حدث بدقة.