جاء ذلك أثناء احتفال تامر حسني بزفاف منسقة أعمال السوشيال ميديا الخاص به، هالة عمر حيث علق تامر بعد الانتهاء من مراسم حفل الزفاف قائلا: "لكل اللي بيسأل عن وجة القرابة بيني وبين العروسة الجميلة دي، شايف أسئلة كتير أنا هحكيلكوا، هي اسمها هاله عمر عرفتها كانت بنت من الفانز صغيرة ومن المقاتلين والمدافعين عن تامر على الإنترنت، ومن كتر دفاعها عني لفتت نظري ومرة رديت عليها شكرتها".

وأضاف تامر: "لما سافرت إسكندرية في الوقت ده لقيت بنت صغيرة أوي بتعيط وبتجري عليا فوقفتلها وفكرتني بنفسها وفضلت تعيط وتقولي احنا معاك ولازم تكمل، عشان كنت بتحارب جدًا في بداياتي فاتصدمت إن اللي بتقول كده بنت صغيره كده والمجهود ده كله اللي عاملاه بنت صغيرة عندها 14 سنة".

وتابع: "وقتها كانت السوشيال ميديا لسه بتطلع.. وكنا في شركتنا بندور على شركة كبيرة تمسكلي السوشيال ميديا، لحد ما قولتلهم أنا مش عايز شركة كبيرة أنا عايز البنت الصغيرة دي هي اللي تمسكها فضلوا يقنعوني إن كده مش صح ولازم حد خبرة يمسكها، وأنا قولت لاء لازم أكتر حد بيحبني هو اللي يمسكها وأنا واثق أن طاقة الحب مفعولها أقوى من طاقة المحترف بلا حب".

واستكمل حديثه عن هالة عمر قائلًا: "فعرضت عليها تشتغل معايا وهي في السن ده مصدقتش طبعًا ومن ساعتها وهي اللي ماسكه كل شغل الميديا الطفلة الشاطرة اللي كبرت دلوقتي قدامكم هاله عمر، أما بقى عريسها العسل ده اسمه عمرو طلب إيدها مني أنا عشان والدها ووالدتها توفاهما الله".

واختتم تامر حسني: "ومن اللحظة دي اتحولت هالة لبنتي الكبيرة بجد.. اللي بتتجوز دلوقتي قدامي وبسلمها لعريسها بنفسي وبغني في فرحها، معرفتش أرد على كلامك عني في الفرح يا هالة رديت دلوقتي هنا ربنا يكرمك ويسعدك مع جوزك الجميل المحترم اللي هيكون ضهرك وسندك ويكمل معاكي مشوار حياتك مع أولادكم الجُمال بإذن الله".

يذكر أنه في أواخر شهر أبريل الماضي، تم إعلان كلًا من تامر وبسمة عن انفصالهما بطريقة راقية، الأمر الذي أحزن جمهور الطرفين، حيث أعلنت أعلنت الفنانة المغربية بسمة بوسيل زوجة النجم تامر حسني انفصالهما رسميا ووقوع الطلاق بينهما بعد زواج دام 11 عاما.