علقت الفنانة عارفة عبد الرسول على ظهورها في برنامج "رامز نيفر إند" الذي قدمه الفنان رامز جلال في رمضان ٢٠٢٣.

عارفة عبد الرسول عن مقلب رامز

وكتبت عارفة عبدالرسول عبر حسابها على فيسبوك:" اتصلت بيا واحده وبكل الحب قالتلى احنا بنفتخر بيكى ونفسنا تحضرى معانا افتتاح محل فى البوليفارد، من فرحتى مسالتش محل ايه لان كان نفسي اروح السعوديه وكل اللى شغلنى الوقت وزنقه رمضان، بس البنت كانت شاطره وعرفت تدبر الميعاد، اخلص تصوير واطلع ع المطار الحق اخر طياره افتتح المحل واطلع ع المطار، كده يعنى صد رد ولكم ان تتخيلوا الارهاق والتعب".

وأضافت:" من أول ماحطيت رجلي فى المطار وانا بعامل كملكة، خدمه مرحبا وكبار زوار وحوسه، وصلت اخدتنى عربيه فارهه الى فندق هيلتون الرياض ونزلت فى حته نتفه سويت يجرى فيه الخيل وكل حاجه تاتش بقيت خايفه المس حاجه تفرقع فى وشى، الروم سيرفز كل شويه يخبطوا جايبين تحيه من مدير الاوتيل وكارت بالانجليزى معناه ان اداره الاوتيل فى غايه الانفشاح لاستقبالي".

واستطردت:" افتح التليفزيون الاقى صورى بفيديو لطيف وقد ايه احنا مش مصدقين انك معانا، تخيلوا معايا بس الحاله اللى انا فيها، الصبح جم بنات كوافير وماكيير والبنت اللى اتصلت بيا واسمها شريفه، بقت تسالنى اسئله عرفت بعدين انها بتشوف شغلها، اطمنت عليا لانى جايه من تصوير واصرت انى اطلب اكل واكل قبل ماننزل.

عارفة عبد الرسول ضحية رامز

وأضافت: وصلت قابلتني المذيعة الجميلة كارلا المريحة للعين والقلب، وخضت تجربه السهم والخيل وانا فرحانة وقصيت الشريط بمقص تحفه ودخلت ع المطعم اللى كل حاجه فيه بتلمع قوى والشياكه والجمال وانا بازداد سعاده وفرحه مافرحتهاش عمري، ووصل الشيف الكبير هو انا فعلا استغربت شكله وقولت لنفسى انه شبه الارهابيين اسود ف اسود كدة، وانا مشرئبه قوى وحاسه انى يسرا ولا مرفت امين، هوب لبست التورتاية، انتوا متخييلين! طلعت سابع سما ونزلت على جدور رقبتي".

واختتمت بـ: "مش مهم المقلب ..صدمتى النفسيه محتاجه علاج فعلا...انا باحب رامز من زمان وعارفه أنه الواد الشقى بتاع العيله وفرحانه بيه انه ماسك فى الواد ده ومش بيتغير حتى افلامه شقيه....لكن برضه مش كده...يعنى افرض جرى لى حاجه...انا طول عمرى صريحه معاكم وفعلاً ماكنتش اعرف وده اللى حصل...اما الست شريفه والسيد رامز ليهم روقه بس اتعالج من الصدمه الاول".

وتدور فكرة مقلب رامز جلال حول استقبال الضيف، وتناول وجبة الغداء في المطعم الطائر على ارتفاع 50 مترًا فوق سطح الأرض، ويصاب بخوف و قلق بسبب الارتفاع، ويحاولوا إقناعه لمشاهدة المدينة من أعلى.

واستخدامه كضيف للترويج للمناظر الرائعة في البلد، ثم يصعد المطعم بالضيف، وسط تواجد مجموعة من الكومبارس العاملين فى البرنامج، ويظهرون كضيوف بالمطعم.

ويبدأ المطعم في الانهيار وسط رعب كبير من الضيف، وتسقط الطاولات والأطباق، وسط صراخ الكومبارس والضيف، ويكون أحد هؤلاء الضيوف هو رامز جلال.

إقرأ أيضًا..

بسبب 200 جنيه.. عارفة عبد الرسول «تريند»