8 معلومات عن تامر عبد الحميد «من بكار إلى القبطان عزوز»
من أرشيف محكمة الأسرة| جوزي بيلبس حريمي واللبانة على طول في بقه
الثلاثاء 11/أبريل/2023 - 12:56 م
وائل كمال
تروي سيدة في أواخر الثلاثينيات معاناتها مع زوجها الذي انقلب حاله رأسًا على عقب، ليصبح غريب الأطوار على حد وصف زوجته ويرتدي ملابس ممزقة تشبه الملابس النسائية.
وقالت الزوجة في دعوى خلع بمحكمة الأسرة: "اتجوزت ابن الجيران بعد قصة حب سنوات طويلة، كان راجل مناسب وشاطر عمري ما لاحظت عليه أي حاجة غريبة أو أي تصرف، وكانت حياتنا سعيدة، شغال مهندس برمجيات وجاله شغل في دولة أجنبية، وافقت وكنا مبسوطين الفرصة دي اللي هتغير حياتنا وتنقلنا مستوى تاني، رجع من السفر بعد 8 شهور إجازة وكانت الصدمة بالنسبة ليا".
وتابعت الزوجة: "جوزي رجع متحول تماما، بقى بيأكل لبان بشكل غريب وزيادة عن اللازم، كمان صابغ شعره وبيغير اللون كل فترة، بقى بيلبس هدوم مقطعة كتير زي لبس السيدات، راح شخص ورجع حد تاني خالص، بقا شخص عمري ما شوفته.. بقيت حاسة إن مفيش فرق بينا إحنا الاتنين، بقيت بتحرج أخرج معاه في مكان، و لو حصل أمشى بعيد عنه وببقى مكسوفة جدا وأنا معاه".
وأردفت: "اتكلمت معاه كتير على التغيير اللي حصل في شخصيته وكل مرة يحصل مشاجرة بينا، آخر مرة ساب البيت فترة وقعد عند أهله، طلبت من الطلاق رافض، وكمان مش عارفه أعمل معاه ايه علشان يغير سلوكه اللي اتحول، وهو مش معترف أن دا غلط ولا غريبة شايف الوضع طبيعي.. وبيقولي بلبس على الموضة".
واختتمت: "لقيت نفسي مفيش حاجه حلوة في حياتنا أكمل معاه علشانها ولا في أطفال، ولا هو بقى زوج صالح، والنقاش بينا بقى عبارة عن خناقات وعنف وكل واحد مش متقبل التاني، حاولت معاه ننفصل بينا من غير محاكم وهو رفض، لجأت للمحكمة وأقمت دعوى خلع تحمل رقم 2801 لسنة 2022 أمام محكمة الأسرة بالتجمع الخامس ولم يتم الفصل بها حتى الآن".
