«هير نيوز» تنشر قصص ستات بـ100 ست «المرأة المعيلة».. رحلة كفاح منال مع مرض أبنائها المناعي

بطلة قصة اليوم هي منال أحمد  محمد الأعصر، من محافظة القاهرة، تقول: "الصراحة أنا مشواري طويل شوية، ابتدى لما أبو ولادى سافر بره مصر، وابنى الكبير كان عمره 5 سنوات والبنت الوسطى سنتين ونصف، والتوأم عمر وفرح 3 شهور، وعمر ابني متلازمة داون من ذوي الهمم".

 

وأضافت: "مرة واحدة لقيت نفسى في البحر ولازم أكمل لوحدي ومن طبعي مش بدخل حد في حياتي، صبرت واستحملت حاجات كتييير أوى أوى، وكانت أمي مريضة جدا، وكنت بتابعها مع والدي وأتابع ولادي، وأتابع حمايا وظروف كانت صعبة أوى ووالدهم  بيقول ظروفه صعبة عكس اللى بشوفه".

وتابعت: "ابتديت مشواري مع عمر ابني اللي هو من ذوي الهمم بدري، في مرضه لأن كان بتيعرض لأزمات صدرية كتير وبيتحجز في المستشفى، وابتديت اعتمد على نفسي في المصاريف بالتدريج، ولما عمر كان عنده ١١شهرًا كان لازم تدخل مبكر علشان كان أول مرة أتعامل مع طفل داون سيندروم، روحت بيه مركز سيتي وابتدى المشوار، أنا اتدربت عندهم واتدرب عمر  معاهم ولقيت منهم دعم نفسي كبير ليا ولأولادي".

وواصلت: "ابتديت ادخل المجال وعلشان خاطر عمر ابني درست في المجال ده اللي هو مجال الاحتياجات الخاصة واشتغلت أخصائية تنمية مهارات وعملت كل جهدي لزيادة الدخل.. وللأسف انفصلت عن أبو اولادى في ٢٠١١ واعتمدت على نفسي كليا وأولادى طبعا شركائي في كل خطوة كنت بعملها مع عمر، ومعاهم ابتديت أوجه عمر للسباحة وابتدت تبان موهبتة في السباحة وده ساعد على تقوية الجهاز التنفسي والأزمات التنفسية قلت كتير بسبب رياضة السباحة ثم معهد الباليه".

وأكملت: "اشترك فى ٢٠١٥ فى كورال افتتاح  قناة السويس ثم حفلة اليوم العالمى للإعاقة ٢٠١٥ ثم تواصلت اشتراكات وكان اخواته بيساعدونى بشكل قوى جدا جدا في تمارينه وأي مكان عمر هيروح هما معايا وبدالي وايدهم بإيدي".

  

وزادت: "ابنى الكبير اتحمل معايا المسؤلية من بدري أوي أوي، وبعده أخته وبعده توأم عمر، وأحداث كتيرة اوى اوى اوى  ووالدى كان داعم نفسي ومعنوي قوي، ورغم كده عمره ما اتدخل في حياتي أو اتحكم فينا أنا وأولادي، كان أب عظيم أوي..

وابتديت رحلة علاج التوأم عمر وأخته".

وقالت: "ثم تفاجأنا بمرض البنت الكبرى إن عندها أجسام مضادة بتهاجم الغدة الدرقية ثم الابن الأكبر نفس الأجسام المضادة اللى بتهاجم الغدد والحمد لله على عطاء ربنا، أولادى الأربعة عندهم مشاكل مناعية مختلفة والحمد لله ربنا يشفيهم جميعا  ونكمل باذن الله وبسنده ليا هنكمل".

وأضافت: "ابنى الكبير دلوقتى اتخرج ومعاه بكالوريوس سياحة وفنادق والبنت الوسطى كلية الهندسة وتوأم عمر فى ثانوى عام وعمر فى تلمذة فى التربية الفكرية وهو اجتماعى قوى وبيحب التمثيل وبيشارك معاهم فى مسرحية للمدرسة واستعراض وعمل حفلة فى حضور مديرة الإدارة التعليمية والحمد لله رجع تانى يكمل كل حاجة بيحبها ما عدا الرياضة عشان صحيا مش قادر".

  

وتابعت: "عمر شارك فى حفلة اليوم العالمى للإعاقة قادرين باختلاف الموسم الأول، وأتمنى من ربنا يشفى أولادى يارب 

وأقدر أكمل مشوارى معاهم وأتمنى عمر يكمل في رياضة السباحة اللي بيحبها وأشوفه بطل عالمي ويحققوا كل امنياتهم.

ادعولهم بالشفاء".

يذكر أنه سوف يتم تكريم هذه البطلة من مبادرة بداية جديدة للتأهيل النفسى للمطلقة والأرملة وأبنائها ودعم المرأة المعيلة باحتفالية يوم المرأة المعيلة للسنة السادسة خلال شهر مارس.