قاتلة زوجها: «بياخدني في حضنه زي بنته لكن عشيقي راجل معايا»

كثيرا ما تطالعنا الأخبار وخاصة المختصة بالحوادث بأن زوجة قتلت زوجها للخلص منه والارتباط بعشيقها، إلا أن النهاية دائما ما تكون صادمة بمعاقبة الزوجة وعشقيها الذي ساعدها، لدرجة قد تصل إلى الإعدام أو المؤبد.

المتهمة بقتل زوجها بمساعدة عشيقها، وإلقائه في أحد المصارف بمنطقة أطفيح بالجيزة، كانت قد اعترفت بأنها تعرفت على عشيقها محمد. أ  منذ عام ونصف، أثناء عملهما في إحدى المزارع، وقالت: "مكنتش بحب جوزي وتعلقت بعشيقي لأنه كان راجل معايا وكان بيقف في ضهري، وبيجبلي حقي بعكس جوزي اللي كان طيب وغلبان، وكان بياخدني في حضنه زي بنته".

وأضافت خلال إجراء التحقيقات معها: "وقعت خلافات أسرية بيني وبين زوجي على أثرها طلبت الطلاق منه، لكن هو رفض وأخدت رأي محمد إني أرفع قضية خلع، لكن هو رفض ونصحني إني كدة هجيب العار لأولادي، وأقنعني إننا نخلص منه ونقتله، ودبر الخطة للتخلص منه وقالي إنتي هتبعتيه لحد كأنه هيجيب منه فلوس بجوار أحد المصارف في أطفيح، وأنا هقابله هناك ونقتله ونرميه في المصرف، ولا من شاف ولا من دري، وبعدها اتكلمت مع جوزي وقلتله هتروح لواحد كان شغال معانا في المزارع هتجيب فلوس ليا عنده".

تنفيذ الخطة

وتابعت: "كلمت عشيقي وظبطت معاه علشان يقابلني في الطريق، زي ما اتفقت أنا وهو وفعلا جوزي مشي من البيت وراح المكان، وكلمت عشيقي في التليفون وقلتله إن جوزي طلع من البيت ورايح المكان اللي اتفقنا عليه، وعشيقي أجر عربية وراح على المكان في بنزينة، رجعت كلمت جوزي وقلتله أنه يقابل حد في البنزينة علشان هو اللى عارف مكان الراجل اللي ليا عنده فلوس، وبعدها بساعة اتصل عليا عشيقي وقالي إنه قابل جوزي وهياخده ويخلص عليه".

واستكملت: "عشيقي بعد كده ركب معاه العربية اللي كان مأجرها، وطلع بيه على مكان الواقعة في مكان مفيش حد بيعدي منه كتير، وعمل إن العربية عطلانة، ونزل فتح الكبوت وجوزي نزل معاه وأول ما جوزي ادى لعشيقي ضهره خنقه، وكتم نفسه، ورماه في الترعة، وبعد ما عمل كدة كلمني في التليفون، وقالي أنا خلصت عليه ورميته في الترعة، وحكالي على اللي حصل وجالي البيت حكالي على اللي حصل بالتفصيل، ومشي وتاني يوم كلمني وقالي روحي اعملي محضر غياب لجوزك، علشان محدش يشك فينا، وأنا بعدها بخمسة أيام رحت عملت محضر، وقلت إن جوزي غايب عن البيت علشان محدش يشك فينا أنا وعشيقي، وبعد كده قبضوا عليا وعلى عشيقي، وأنا قولتلهم على كل اللى حصل واعترفت، وحبيبي اعترف وهو ده كل اللي حصل".