بقلم الدكتور مظهر أمين: يوميات «سي السيد»

بنام بدري..

أصل الغلا وقف الشغل وانتو عارفين إن البضاعة أتلفها الهوى والبرد خلاني كانن في البيت.

المهم

إمبارح والدنيا ساقعة واللحاف تقيل حسيت بالجوع فشخطت في أمينة وقلت:

قومي يا وليه اعمليلي حاجة أكلها .

قالت:

الله

ما المطبخ قدامك أهوه

ما تقوم تهز طولك وتسلق لك بيضتين في أيامك الزفت دي‼

الشيطان ركب دماغي وقالي:

إيه ده

إيه اللي جرى

إيه الأيام الغبرة دي

انت يا سي سيد اللي تتهز لك شنبات وأمينة طول عمرها تقول حاضر ونعم يا سي سيد يجي يوم تتهزأ كده.

مكانش العشم يا سي سيد.

الدم غلي في نافوخي ووشي بقى أحمر زي القوطاية ورحت حاطط إيدي في عبي ورحت مطلع المطوة قرن الغزال وفاتحها وضاربها في قلب الشيطان.

وقمت أسلق لي بيضتين....