كشفت الفنانة وفاء سالم حقيقة الصور التي تم تداولها لها قبل خضوعها لعملية التجميل الأخيرة.. مؤكدة أنها مجرد فوتوشوب وذلك خلال حوارها ببرنامج" كلمة أخيرة" مع لميس الحديدي.

وتحدثت الفنانة وفاء سالم عن الصور التي تداولها لها قبل عمليات التجميل قائلة "مش لدرجة الخلل، واللي في الصورة فيه فوتوشوب، وعمري ما وصلت لكده، في لقطات وشي كان فيها انتفاخات كبيرة من الفيلر لكن مش أنا".

واسترسلت كلامها "مش شاطرة أعرف في أن حد كلمني وتعالي هوريكي حاجة، لكن لما حد يستدرجك مبعرفش، وبدأت الحكاية بإن تعالي اتفرجي واتقالي هيبقي فيه نضارة، وانا مكنتش عارفة الفرق بين الجيد والسيئ والفيلر لازم تبقي عارفة من اللي بيحقنلك، وأنا مش عارفة أقول إيه في الناس اللي بتثق في أي حد بدليل إني وثقت ووصلت لحاجات مش لطيفة".

وتابعت عن استدراج دكاترة عمليات التجميل لها " قالولي الأول هنعملك حاجة فيها نضارة وطلعت حقن، وأول حاجة اتعملت كانت حقن في شفايفي، ولما جيت اتكلم لاقيت اني مش عارفة املك الحروف، وبردو ناحية الخدود، ولاقيتهم عملولي سداغ كبيرة، وخدودي كبرت من حقن دهون، وقالولي ده صحي، وكتر الكلام خلاني أصدق".

واختتمت عن معانتها بعد عمليات التجميل " انا عملت خيوط وكل دكتور  يجود عن التاني، وعند كل مرحلة لاقيت الدنيا بتبوظ مني، ومكنتش طايقة ابص لنفسي، ولما عملت مسلسل مع عادل إمام وكلبش 2 العملين دول بدأ يبقى وشي لما ببص في المونيتور يبقى وحش  وأصلحه يبوظ، وكان أدائي ناقص ومش حابه روحي".

يشار إلى أن الفنانة وفاء سالم قد شاركت مؤخراً مجموعة صور عبر حسابها الرسمي بموقع التواصل الاجتماعي "فيس بوك" والتي ظهرت فيها بملامح مختلفة وجميلة خطفت أنظار متابعيها، وذلك يعد ظهورها الأول بعد خضوعها لـ عدد من العمليات التجميلية الفاشلة والتي عرضت وجهها للتشوه، وحازت الصور على ردود فعل إيجابية من قبل الجمهور.