ريهام عبد الغفور: «كنت طفلة خجولة.. واتبسطت أن ابني عاش تجربة عاطفية»

تصدرت الفنانة ريهام عبد الغفور تريند تويتر بعدحلولها ضيفة على برنامج "صاحبة السعادة"، الذي تقدمه الإعلامية إسعاد يونس على قناة dmc، والحديث عن العديد من أسرارها الشخصية.

وتحدثت الفنانة ريهام عبدالغفور عن بدايتها الفنية ورفض والدها دخولها عالم التمثيل قائلة:" والدي مكنش عايزني اشتغل وانا بدرس، انا دخلت تجارة إنجلش وبعد كدة طلع في دماغي إني أمثل فقالولي اتخرجي عشان كانوا خايفين متخرجش، حنان مطاوع حبيبة قلبي وعشرة عمر، وعندنا نفس الخطة ابهتنا فنانين ومكناش حابين نمثل وابتدينا مع بعض وخطوتنا في نفس الاتجاه، ممكن مش سريعة بس كويسة".

 

واسترسلت الفنانة حديثها "انا بنت أبويا ومتعلقة بيه تعلق فظيع وانا شوفت اخلاصه للموضوع فحبيته من غير ما احس، وأنا كنت طفلة خجولة اوي وأما كان حد بيجي يتصور مع أبويا كنت بخبي وشي، فده اللي مكنش مخليني اتخيل ولا اهلي يتخيلوا إني ممكن أكون ممثلة".

وتابعت كلامها عن طفولتها "مولودة في القاهرة ومليش اي علاقة بالمحلة، كنت طفلة ممكن اقعد 10 ساعات بلعب في الرملة لوحدي، وكنت بقعد اعمل حوار كتير وتمثلية مع العروسة بتاعتي فماما حست إني ممكن أمثل، وكنت خجولة جدا وحساسة وطفولة طبيعية وكنت ديما موجودة مع اخواتي وكان ليا بس صحاب مدرسة بس " 

كذلك تطرقت الفنانة للحديث عن نجلها فقالت " خلفت ابني الكبير  وانا عندي 21  سنة فقريبين من بعض جدا وبنكون فاهمين بعض وكان اسهل كشخصيات، لكن الصغير السيطرة عليه اصعب، هو كان طول الوقت عايز يدرس قانون وفجأة قال عايز التمثيل والإخراج فقولت أكيد زي اللي حصلي مع أبويا وبمساعدة زميل ليا بعت لمخرجين جدا فيلم قصيرليه فشجعوني اني ادخله، و بحاول مع ابني الصغير نبقى صحاب ونتكلم ونتفاهم وأبوه واخوه متكفلين بموضوعه".

اقرأ أيضًا..

ريهام عبد الغفور تعلق على أزمة منة شلبي.. وتؤكد: هذه الأدوار ندمت عليها

وأضافت الفنانة عن طريقتها في تربية أبنائها: "ولادي الاتنين مش بعاقبهم والضرب مش سياستي وبعاقبهم إني ازعل منهم لأنهم بيحبوني أوي وابني الكبير أول ما اتضايق منه بيفضل ورايا لحد ما يصالحني وانا اتبسطت انه عاش تجربة عاطفية".

الجدير بالذكر أنه يعرض حاليا للفنانة ريهام عبدالغفور مسلسل "الغرفة 207"، بجانب كلا من النجوم محمد فراج، ومراد مكرم ومريم الخشت وعلي الطيب وبيومي فؤاد وأسماء جلال وغيرهم العديد من الفنانين، والمسلسل سيناريو وحوار تامر إبراهيم، وإخراج  تامر عشري.