شهد مهرجان القاهرة السينمائي في دورته الـ44 أمس، الأحد، تكريم الفنانة لبلبة تقديرًا عن أعمالها المميزة طوال السنوات الماضية، وذلك عقب انتهاء عرض فيلم تسجيلي عن حياتها ومشوارها الفني.

وتحدثت الفنانة لبلبة خلال تكريمها قائلة: "على فكرة والدتي كانت حامل فيا وهي كانت بتتفرج في السينما على فيلم، وجالها وجع الولادة فجأة، ولو ملحقوهاش وقتها كنت هنزل على الأرض وأتولد في السينما، وكان يوم زي النهاردة 13 نوفمبر الساعة 12 بالظبط يوم ما اتولدت".

واسترسلت حديثها عن دور والدتها في حياتها الفنية، قائلة: "والدتي كانت دايما بتشجعني ومفيش مرة مكنتش موجودة في الكواليس معايا في حاجة بصورها، وكانت دايما تقولي يا نونا انتي هتتكرمي المرادي في مهرجان القاهرة السينمائي، ومتكرمش، وييجي المهرجان وتقولي هتتكرمي المرادي ومتكرمش، ودلوقتي بحقق لها أمنيتها وهي مش موجودة وأنا بتكرم النهاردة، وعايزة أقولكم أنا بشكركم".

اقرأ أيضًا..

شاهدي.. أول ظهور لـ شيرين عبد الوهاب مع حسام حبيب بعد زواجهما مجددًا

واختتمت حديثها قائلة: "بشكر بلدي مصر اللي اتربيت من خيرها ووزيرة الثقافة الدكتورة نيفين الكيلاني والأستاذ حسين فهمي، وجمهوري اللي شجعني وأنا طفلة لحد اللحظة اللي أنا موجودة فيها دي، وبشكر كل اللي اشتغلت معاهم فنانين وعمال ومخرجين وكل زمايلي اللي بحبهم وبيحبوني".

وبدأت مساء أمس الأحد الموافق 13 نوفمبر، فعاليات الدورة 44 لمهرجان القاهرة السينمائي الدولي على المسرح الكبير بدار الأوبرا المصرية، وتستمر حتى يوم الثلاثاء الموافق 22 من نفس الشهر برئاسة الفنان حسين فهمي، والمهرجان يعرض 97 فيلمًا من 52 دولة، يقيم 12 سجادة حمراء للاحتفال بـ12 فيلمًا من الأعمال المشاركة.