تحدثت الفنانة عفاف شعيب عن صداقتها الشديدة التي كانت تجمعها بالفنان الراحل أحمد زكي، مؤكدة أنها من حاولت إقناعه بأداء مناسك الحج ونصحته بعدم أداء دور حليم.

 

وعبرت الفنانة عفاف شعيب عن محاولة الناس التفريق بينهم خلال استضافتها في برنامج واحد من الناس من تقديم عمرو الليثي، عبر فضائية الحياة قائلة: "أنا وهالة فؤاد أقنعنا أحمد زكي بالحج واقتنع وجه وبعد كده في ناس وقعت بيني وبينه، في ناس وسوسوا له وقالوا له خليك قاعد في الأوتيل وأنا قلت له لازم تروح علشان تقرأ قرآن قال لي طيب، وفجأة وإحنا قاعدين لقيته بيصرخ في وشي قال لي مش رايح معاكوا قلت له أنت حر دي مناسك لازم تلتزم بيها، اتاري في ناس قالوا له سيبك منها ده كلامها مالوش لازمة".

وتابعت شعيب كلامها: "وفي نفس الوقت في حد قال لي إنه ما قرأش قرآن في عرفة، فقلت له ليه ما قرأتش قرآن، قال لي أنا شيطان من الشياطين، قلت له إيه الأسلوب ده، وقلت له اوعى تكلمني وروحت أوضتي وقلت خلاص مش هكلمه، وجالي البيت من غير ما يتصل وقال لي بصي انت جوهرة غير كل الناس".

واسترسلت عفاف موضحةً أنها كانت تحاول إبعاده عن أداء دور حليم، وقالت: "قبل ما يعيا العيا الكبير جاني البيت وقالي انا هعمل حليم قولتله انا عارفة انك بتحبه بس هتعمله ليه؟ عشان ساعتها حسيت بحاجة جوايا انه مش هيكمل لما يعمل الدور ده، لأنه كان عاشق للسادات وجمال وحليم، قولتله بلاش قالي لا هعمله".

وأردفت: "وبعدين عيي وتعب وبقى يكلمني من المستشفى وروحتله 3 مرات، وكل ماروح الاقي ناس مالهومش لازمة ولا كان بيحبهم وبيقولي فارضين نفسهم عليا، لما توفى كنت بتكرم في اليمن، واخويا قالي الخبر قولتله لا متقولش كده، وساعتها عملوا عزاء كبير وخدت العزاء أنا وأخويا".