زوجة تطلب الخلع لسبب صادم: تزوجني لأنه يحب أختي

وقفت زوجة مخدوعة أمام محكمة الأسرة تشكو من زوجها وشقيقتها في دعوى خلع غريبة، بعد تحول حياتها إلى جحيم؛ ما دفعها لإنهاء علاقتها بزوجها.  

في نبرة حزينة يشوبها الدهشة والحسرة وأنفاسها تهز أرجاء الجلسة المغلقة روت الزوجة مأساتها قائلة: "زوجي يحب أختي واتجوزني مع إن كان في علاقة حب بينه وبينها، وأختي خبت عليا إنه كان بيحبها قبلي، وحولا حياتي إلى جحيم".

وأضافت الزوجة: "اتجرحت منهم ومكنش قدامي غير طلب الخلع والمحكمة".

البداية كما ترويها الزوجة أن معاناتها بدأت منذ حوالي سنتين مضيفة: "كان عمري 19 سنة، سافرت خارج مصر، قعدت 10 سنين علشان كنت بدرس، بعد كده اشتغلت والحياة خدتني والعمر وصل 30، أهلي طلبوا مني أرجع مصر عشان أتجوز، رجعت مصر خلال سنة اتقدملي جوزي أهله كلموا أهلي وكانوا مستنيين ردي وموافقتي".

وتابعت: "لي أخت أصغر مني بـ5 سنين وهي عايشة مع والدي ووالدتي في مصر سألتها عليه قالتلي أنا معرفهوش والقرار يرجع لك، وأهلي مش مديني فرصة أسأل عنه، لأنهم كانوا بدأوا يخافوا من سني اللي بيكبر ووافقت".

وواصلت: "كان لي أصدقاء من أيام مدرستي في مصر، في يوم لاقيت واحدة منهم بتكلمني وطلبت مني تقابلني وقالتلي إحنا محتاجين نقعد نتكلم في أسرع وقت، وبالفعل اتقابلنا وقالتلي سامحيني لو اللي هقولهولك ده جه في وقت متأخر بس أنا ضميري ميسمحليش أخبي عليكي أكتر من كده".

وتابعت: "بدأت أقلق وقلت لها اتكلمي، قالت لي أنتي عارفة إننا من فترة مش على تواصل بحكم إني اتجوزت وخلفت وإنتي كنتي مسافرة بره، وأنا معرفتش إنك رجعتي مصر واتجوزتي غير من الفيس بوك لكن اللي أنا جاية أقولهولك النهاردة إني لما شفت صورك مع عريسك في الفرح فضلت أشبه عليه لحد ما عرفت إن هو ده الشاب اللى كان مرتبط بأختك لمدة سنتين وهي في الآخر رفضته عشان كان بيزعلها كتير وبيكلم بنات".

وواصلت: "تابعت صديقتي حديثها قائلة: أنا معرفش إنتي تعرفي ولا لا بس إنتي عشان إنسانة طيبة حرام يضحك عليكي، أنصحك تواجهيه عشان لو لسه عنده مشاعر ليها إنتي كدة هتبقي في خطر معاه إنتي وابنك اللي في بطنك".

وأضافت: "في نفس اليوم رجعت البيت زوجي كان موجود وطلبت من أختي تجيلنا البيت، أختي جت وقعدت أنا وهي وجوزي نتكلم، وواجهتهم بكل اللي أنا عرفته، ومشوفتش غير السكوت منهم، ومفيش كلام يقولوه، لحد ما أختي قالتلي ده كان زمان أيام المراهقة ومفيش حد يعرف حاجة عن الكلام ده وخلاص مبقاش في أي حاجة بيني وبينه".

واختتمت: "بعدها زوجي قال أنا مش هنكر إني في بداية زواجنا ولما طلبت إيدك مكنتش قادر أنسى أختك لكن بعد ما عشنا مع بعض كل ده اتنسى".