تحدثت الفنانة منال عبداللطيف عن رأيها في الحياة الزوجية.. لافتة إلى أن المشاركة أساس الحياة الزوجية السعيدة، فلا بد للزوج أن يحرص على مشاركة الزوجة في تلبية طلبات أبنائهما، متابعة: "كل حالة مختلفة عن التانية.. أنا مش بتكلم عن الرجل اللي بيطلع يصحى من النوم بدري ويروح شغله ويرجع تعبان، دا كل الاحترام ليه معندوش وقت ويا دوب صحته على قد عمله اللي بيقدر يفتح بيه البيت".

 

واسترسلت الفنانة كلامها: "الراجل اللي قاعد في البيت مش بيعمل حاجة فيها إيه لو نزل ودى الأطفال التمرين.. الحياة الزوجية مشاركة هما اتجوزوا علشان يكون فيه بينهما مشاركة.. وهي تعبانة يسندها أو هو تعبان هي تشيله، إيه المشكلة لو الراجل ودى العيال التمارين، مش لما الراجل بيتزنق ماديًّا مش بيقولها معلش استحمليني وبتقف جمبه؟".

وأوضحت الفنانة رفضها القاطع للظهور ببروكة في الأعمال الفنية قائلة: "مجاليش هاجس إني أمثل ببروكة واستحالة يجيلي، لكن اتعرض عليا لحد وقت قريب، وأنا بعتبر دا تحايل على الحجاب.. أنا اتحجبت بمحض إرادتي وأنا موافقة وواخدة القرار ولو عايزة أقلع الحجاب هقلعه أنا محدش أجبرني عليه، ولو عايزة أكمل تمثيل كنت كملت"، جاء ذلك خلال حوارها ببرنامج" كلام الناس" المذاع عبر فضائية "إم بي سي مصر".

وقالت: "والتحايل في حد ذاته في شتى الأمور أنا بعتبره ضعفًا، والضعف بعيد كل البعد عني؛ لأنه أنا عايزة أعمل حاجة هعملها لكن أتحايل ليه على الحجاب".