حلت الفنانة صفاء جلال ضيفة على برنامج "كلام الناس" والذي تقدمه المذيعة ياسمين عز ويذاع على فضائية "إم بي سي مصر"، تحدثت فيه عن الهجوم التي تعرضت له بسبب حجاب ابنتها وسبب عدم تجسيدها لدور راقصة مرة أخرى.. وقالت: "اخترت أتجوز بشكل معين، وأتجوز راجل شرقي، وأمشي على هواه". 

تحدثت الفنانة صفاء جلال عن الهجوم الشديد الذي تعرضت له بسبب حجاب ابنتها وعدم ارتدائها الحجاب، قائلة: "كنت فرحانة بعيد ميلاد بنتي العشرين، وكتبت على صفحتي الخاصة كل سنة وأنت طيبة، أمورتي الحلوة كبرت، والكلام الجميل، فجأة لقيت هجوم عنيف شديد اللهجة زي اتقي ربنا، وتعلمي الأخلاق من بنتك، توبي إنت رجلك والقبر، والناس ردت عليهم الحمد لله".

وأضافت "ما رديتش على الهجوم إلا في مداخلة مع بنتي في برنامج الإعلامي وائل الإبراشي، الله يرحمه ويغفر له كان إنسان عظيم جدًا، وسلمى اتكلمت ومش بتحب الظهور، وبنتي قالت ماما هي اللي علمتني كل حاجة، وبتعلمني أحب ربنا وأصلي وأصوم، وهي اختارت وهي في ثانوية عامة إن هي تتحجب، قولت لها لازم تلتزمي وتعمليه صح، وهي عملته بحب لربنا".

وتابعت: "بتمنى أتحجب زي أمي وأختي، وفرحت ببنتي جدًا، ولما الناس هاجمت أنا مردتش خالص".

تطرقت للحديث عن عدم أداء دور الراقصة مرة أخرى فقالت: "بعد ما عملت دور راقصة في مسلسل امرأة من زمن الحب جوزي قالي مش هتعملي دور رقاصة تاني، وهو قالي احنا هنكمل تمثيل بس بلاش دور رقاصة تاني خالص فعشان كدا معملتش دور رقاصة".

وعن علاقتها بزوجها قالت: "الجواز عامة تفاهم واحترام وحاجات كتير لازم تبقى احنا الاتنين بنشوف إيه اللي يزعل التاني ومنعملوش، ودايما أول لما الدور بيجيلي لو فيه أي محاذير أخلاقية مش بعمله حتى لو بيعملي إيه، الحمد لله احنا بقالنا دلوقتي 24 سنة مع بعض".

واستطردت صفاء جلال كلامها "هي اختيارات في الحياة، كل واحد فينا بيختار حاجة معينة، هل أنا اخترت نمرة واحد أكون فنانة، ولا نمرة واحد أبقى فنانة وزوجة وأم، كل واحد فينا عنده أولوياته، في فنانة بتختار أولوياتها إنها تبقى نجمة، شغلها أهم حاجة في حياتها، هو اللي بيعيشها، بيديها الإحساس بالسعادة والرضا عن الحياة"

وتابعت عن زوجها: "كلها أولويات، أنا اخترت إن نمرة واحد يبقى البيت وزوجي وبناتي وبعدين شغلي، في ناس تانية بتختار العكس، أنا اتجوزت وأنا عندي 24 سنة، صغيرة جدا، أنا اخترت أتجوز بشكل معين، وأتجوز راجل شرقي، وأمشي على هواه هو، وعلى حسب هو بيحب إيه؟، دلوقتي الستات هيشتموني على الكلام ده".

واختتمت: "لما بعمل شغل بعمله كويس قوي، بس ميأثرش على بيتي وعلى حياتي، وبرضه في رجالة وحشة كتير، أنا 90% من صحباتي مطلقات، وستات عادية مش ممثلات ولا أي حاجة".