ضابط وابن عمدة.. سالي عبد السلام تكشف هوية زوجها للمرة الأولى

كشفت الإعلامية سالي عبد السلام عن هوية زوجها، وذلك بعدما تصدرت تريند منصات التواصل الاجتماعي بعد حفل زفافها يوم السبت الماضي.

وكتبت سالي عبد السلام في منشور عبر حسابها الرسمي على "فيسبوك": "الحمدلله الذي تتم بنعمته الصالحات، ‎ما شاء الله اللهم بارك، لما يتقالي مصر كلها فرحنالك ده رزق، لما الناس دي كلها اللي بحبها تيجي ده رزق، كل واحد عمل شغله بحب في الفرح ده رزق".

وأضافت سالي عبد السلام: "إن يتقالي قفلتي الجيزة كلها ومفيش مكان في باركينج الأوتيل، الناس بتركن برا صف تالت عشان تجيلكوا ده رزق وإحنا آسفين، ‎طول عمري كان نفسى أتجوز ظابط محترم وطيب وبيخدم الناس لله، ربنا رزقني بظابط مهندس، مقدم مؤمن الباز، ابن عمدة الشرقية الحاج سالم حبيبي الله يسعده".

وعن زوجها، قالت سالي عبد السلام: "صبرنا أنا ومؤمن 36 سنة وهو صبر ٤ أيام أكتر، هو أكبر بـ 4 أيام. كل المعلومات اللي الأخوة الصحفيين كتبوها مش صح، لا رجل أعمال ولا خريج الـAUC، الحمدلله حمداً كثيراً، وبرضه محدش هيصدق عرفنا بعض إزاي".

واختتمت سالي عبد السلام حديثها وقالت: "يا طيب يا جدع يا محترم يا خدوم يا ابن الحلال بحبك فى الله يا طيب. ربنا يرزق الكل يا رب، ادعولنا محتاجين دعوات كتير أوي، جبرنا بخاطر الكل، يا رب اجبر بخاطرنا".

وتصدرت الإعلامية سالي عبد السلام محركات البحث عبر "جوجل" ومواقع التواصل الاجتماعي بعد زواجها من مؤمن الباز، والتي كشفت مؤخراً أن سبب زواجها منه جاء عقب حوارها مع المتحرش، مشيرة إلى أن حادثة التحرش هذه هي التي تسببت في زواجها من مؤمن، دون الكشف عن مزيد من التفاصيل.

سالي شاركت عدة صور لها عبر حسابها علي موقع التواصل الاجتماعي وتبادل الصور والفيديوهات "إنستجرام" معلقةً عليها: "أخيرا اتجوزت حبي إن بعد الصبر جبر.. اللهم بارك لنا وبارك علينا واجمع بيننا في خير.. قصة فيلم والله يا ربي ورب ضارة نافعة إن موضوع المتحرش ده يجيبلي مؤمن.. مش هزعل تاني من ابتلاء يا ربي"، وأوضحت أنها لن تحكي قصة التحرش التي تسببت في تجمعهما معًا إلا للإعلامية "مني الشاذلي" أو صاحبة السعادة "إسعاد يونس".

وتحدثت سالي عبد السلام عن حفل زفافها ومدى سعادتها فقالت في بث مباشر نشرته الإعلامية سهير جودة: "لما أتخانق مع جوزي هروح أشتكيه في المحكمة؟ أنا حاسة إني مخضوضة لسه ومخطوفة كده والفستان تقيل أوي ومش عارفه العرايس بيستحملوا الفساتين إزاي كده".

وتابعت سالي عبد السلام عن زوجها: "هشيل مؤمن جوزي في عنيا وهبطل جنان وهسمع الكلام وآخد بالي منه، وفستاني من نيقولا جبران وبتمنى من الجمهور يدعولي".