نادية الجندي: "مفيش نجمة قدرت تهز عرشي لأني مميزة"

حلت الفنانة نادية الجندي، ضيفة مساء الخميس في برنامج "حبر سري" وتحدثت عن العديد من التفاصيل التي تخص حياتها ورأيها في نجمات الجيل الحالي وعلاقتها بإبنها هشام وسر ابتعاده عن الأضواء. 

أوضحت نادية الجندي أنها تري أنه لا توجد أي فنانة استطاعت أن تأخذ مكانتها في عالم الفن، قائلة: "مفيش حد من النجمات قدر يهز عرش نادية الجندي وفيه نجوم طلعوا على قدر كبير من الفن ومن الالتزام على الساحة أنا بحبهم وبحترمهم جدًا وكلهم أصدقائي".

وتابعت نادية الجندي كلامها: "زي منى زكي وياسمين عبد العزيز وزينة وهند صبري ومنة شلبي.. كل دول أنا بحبهم وبعتز بيهم جدًا ولكن مكانة نادية الجندي معتقدش أن فيه حد خدها لإني كنت متميزة لا بقلد ولا بتقلد".

وتطرقت للحديث عن نجلها هشام وسر ابتعاده عن الفن قائلة: "لو رجع بيا الزمن كنت أتمنى أخلف أكتر من ولد.. ربنا يخليه ويحفظه بس حكاية الابن الواحد دايما بيخليكي طول الوقت خوفك عليه وقلقك.. ولو إن أنا مدلعتوش.. دايما الولد الواحد بيبقى متدلع لكن أنا كنت صارمة جدًا في تربيته.. بس حتة إن طول الوقت إنتي قلقانة عليه أكتر من اللازم وأعتقد لو عندك اتنين أو تلاتة القلق بيقل شوية".

وتابعت عن سر ابتعاد نجلها عن الفن: "نجوميتي مضرتش ابني هشام.. رغم إن أبوه نجم كبير وأمه نجمة لكن هو بعيد عن الأضواء وعن الوسط وليه شخصيته المستقلة خالص ومعندوش حتة الغرور.. وأنا مبعدتوش عن الأضواء هو لو كان موهوب وحب يمثل أو يخرج مكنش هيبقى عندي أي مانع اطلاقا بس هو خد كارير تاني يعني دراسة ولغات".

وعبرت نادية الجندي عن رأيها في الدور الذي قدمته النجمة غادة عبد الرازق في مسلسل "الباطنية" وهو نفسه الدور الذي قدمته النجمة نادية الجندي في الفيلم، موضحةً: "غادة عبد الرازق ممثلة مجتهدة جدًا وقوية جدًا لكن أنا كان ليا رأي في مسألة أن إنتي تعيدي تاني أعمال كان ليها بصمة كبيرة وصدى عند الجماهير".