"اتطلقي دلوقتي".. تعليقات السوشيال ميديا تشجع الزوجات على «خراب البيوت»

أصبحت مواقع التواصل الاجتماعي أداة لخراب البيوت بشكل كبير في الفترة الأخيرة؛ حيث تطرح الزوجات مشكلتها على مجموعات خاصة بالمشاكل حتى تحصل على الآراء في التعليقات، والكثير من التعليقات تسبب في اشتعال المشكلة وتشجيع المرأة على الطلاق.. 

وإليك نموذج لإحدى المشكلات التي نشرتها امرأة على "فيس بوك"؛ حيث كتبت في منشور: «دلوقتي انا متجوزه باقلي 5 سنين قعدت أربع سنين من غير أطفال وربنا كرمني قبل ما ربنا يكرمني جوزي بيغير بطريقة صعبة، لو رحت عند ماما كل شوية اتصالات مين عندك وبتعملي إيه بزيادة بلبس براحتي عادي بس لازم أكون معاها مبخرجش إلا معاها، قلت يمكن علشان لسة ربنا مش كرمنا هو متخيل إني ممكن أسيبه بيغير من أي حد حتى لو أصغر مني، وبرضو بعد ما ربنا كرمني يعني حتى لو حد ييجي عند ماما وأنا هناك يعملي مشكلة».

وأضافت: «ماما بتقولي اطلقي لأن عشتك هتبقي سواد مع العلم إننا واخدين بعض عن قصة حب أكتر من 8 وجواز 5 وساعت الغيرة مبشوفش قدامه وبيضرب، ممكن تنصحوني أكمل ولا أطلق لأني تعبت بس غلطتي الوحيدة إني كنت بتلاشاه وبخاف أزعله هو يمكن فهمه ضعف مني، أنا متخيلتش إني أنزل مشكلة ليا بس بصراحة احترت هو معاملته معايا كويس بس برة الغيرة بس تعبت ودفني بالحيا والناس اللي هتقول ده حب أنا بحبه وحابة انو يغير عليا بس بزيادة أوي لدرجة ممكن يحاسبني ع حاجة أنا مليش علاقه بيها أصلا ويا ريت من غير تريقة».

كما علقت منال: «لا ده مرض واضطراب نفسي لازم يتعالج بس لو اعترف إنه عنده اضطراب الموضوع كبر ووصل للضرب كده يبقى كثير وانتي بتفوتي وتيجي على نفسك ليه؟ كل ما تفوتى كل ما يزيد الضرب، ومد الإيد خط أحمر لازم تقفي وقفة كبيرة وتاخدي موقف واطلبي الطلاق وصممي عليه علشان يشعر إنك هتضيعي منه واشرطي مش هرجع إلا لما تتعالج أو تطلقنى واوعي ترجعي إلا لما يروح لدكتور ويتحسن يمكن يستجيب، غير كده اوعي تهيني نفسك وتتحملي زيادة، ربنا هيحاسبك إنك هنتي نفسك لأنه سبحانه خلقنا وكرمنا مش علشان نتهان من خلقه».

بينما قالت راندا: «مامي عايزاكي تطلقي عشان بيغير اتقي الله متحوليش تثيري غيرته احمدي ربنا في رجالة النخوة ماتت معاهم في 73».

وعلقت صفية: «مفيش حاجه اسمها بيعاملك كويس لو بيضربك الضرب دا ميتسكتش عليه اسمعي كلام أمك هي أكيد فاهمة أكتر منك، وفعلا عيشتك هتبقى سودة لو هي بالمنظر دا، فيه فرق بين غيره وبين تحكم وقرف».

وقالت وعد: «أم إيه اللي بتقولك اتطلقي إيه العبط ده؟ ما يتنيل يغير وإيه المشكلة ما لو مش بيغير عليكي يبقى مش بيحبك، ووقتها كنتي برضو تقولي عايزة أتطلق لأنه مش مهتم بيا ولا بيغير عليا، وربنا إحنا صنف نكدي فعلا».