انتصار عن التربية الجنسية: «قلت لابني كل حاجة وهو في ابتدائي»

حلّت الفنانة انتصار، ضيفة في برنامج "كلمة أخيرة" الذي تقدمه الإعلامية لميس الحديدي على قناة ON وأدلت بكثير من التصريحات عن الأدوار الكوميدية وعن تربية الأطفال على الحياة الجنسية.

وقالت انتصار عن تربية الأطفال: "التربية الجنسية في المدارس مهمة جدًا، عشان الأطفال مايطلعوش لما يكبروا يقتلوا بعض وهما في الجامعة، أو يغتصبوا بعض والبنت تبقى هبلة أو هو مش فاهم، أنا قلت لابني كل حاجة من ابتدائي".

وأضافت: "لازم نوعي الطفل ونفهمه الثقافة الجنسية وحدود العلاقة مع الطرف الآخر، عشان متحصلش صدمة مع أول واحدة تقول له لأ فيدبحها".

وتابعت كلامها: "أنا حكيت لابني كل حاجة من ابتدائي لدرجة إن مدرس جالهم في المدرسة يكلمهم عن الثقافة الجنسية وسأل مين عارف الكلام دا، وابني رفع إيده وقال له مامتي حاكتلي كل حاجة".

وأوضحت رأيها في جرائم القتل المنتشرة هذه الأيام قائلة: "اللي بيقتل واحدة حبها مش مريض نفسيا لكن هو غير ناضج عاطفيا، وحصلت له صدمة مع أول واحدة رفضته، لكن هو مش مجرم.. لو كان ناضجا عاطفيا كان عرف إنه مش فتى أحلامها وكان زمانه تخطى الرفض".

وأوضحت عن أدوارها الكوميدية: "الناس فاكرة إن الكوميدي فقط بيضحك الناس وبيقول إفيهات على المسرح، رغم إن الممثل المصنف كوميدي دوره مهم جداً مثل عبد المنعم مدبولي، وسهير الباروني، وسهير البابلي، وعبد المنعم إبراهيم".

 

وتابعت: "الممثل الكوميدي يعني أنه خلص كل شيء في التمثيل وبقى عنده موهبة كمان يضحك الناس ودي صفة وتخصص مش موجود كتير في العالم".

وأردفت: "أنا ممثلة متزنة ومالية مركزي، بروح أضحك وبعدين أرجع أكمل تمثيل، والممثل الكوميدي نكدي أوي ويعجبك في النكد وفي نفس الوقت يسخر من أحزانه ويضحك عليها، وأنا عندي حتة نكدية كده موجودة بس مش قدام الناس، في البيت بس، لكن بمجرد خروجي من البيت هتلاقي الضحك كله".