تحدث هشام ربيع، زوج المطربة الشعبية بوسي، عن تفاصيل عودته لأم أولاده، وحقيقة القطيعة التي استمرت بين الفنانة ووالدها قبل وفاته.

قال هشام في مداخلة هاتفية له مع الإعلامية بسمة وهبة في برنامج "90 دقيقة": "المشكلة إن بوسي مطربة مشهورة فدا اللي بيخلي الناس تتابع أخبارها، وهي أكتر واحدة بتتجرح لما يتكتب أي حاجة تجرح شخصيتها أو كرامتها.. وأنا مش عارف الناس شاغلة دماغها بالموضوع دا أوي ليه، أنا صحيت الصبح لقيت الدنيا مقلوبة مش عارف ليه".

تحري الدقة

وأضاف: "دي أم ولادي ودي مراتي وهي بالنسبالي ليها قدر كبير من الحب والأخلاق والإنسانية، واللي بيضايقني إن الناس اللي قاعدة على مكاتبها وما بتنزلش ومش بتشتغل ومش بتتحرى عن الخبر، ويطلع يقول أي حاجة في أي حتة يعني كلام ملوش أي أساس من الصحة، يعني واحد يطلع يقول أصل ربنا غضبان عليها عشان والدها، بس هو لو تابع واتحرى هيلاقي إن هي كانت بتكلم والدها شبه يومي ومتصالحين قبل العيد الكبير والدنيا كانت ماشية جميلة ولا فيه غضب ولا فيه عاق، وبوسي عندها مشكلة أنها مبتطلعش ومبتواجهش".

اقرأ أيضًا..

زوجة أحمد زاهر تتسبب في إثارة الجدل بالسعودية

كواليس مصالحة بوسي لوالدها

وتابع كلامه عن مشكلة بوسي مع والدها قائلا ً: "بوسي والدها اتوفى وعرفت بعدها بيومين، زي ما فيه ناس في العيلة وفي اخواتها بيحبوها في ناس مبتحبهاش وفي ناس عايزين مصالح معينة منها ولما أنا كلمتهم قالولي لا أصل هو توفى عشان كان قاعد لوحده في البيت ومعرفناش غير بعدها بيومين".

وأضاف: "بوسي اتصلت بناس هي بتثق فيهم هناك في العيلة وقالتلهم يا جماعة لو سمحتم لو بابا عليه أي فلوس حد يبلغني بيها".

وعن سبب رفضها توضيح مصالحتها مع والدها للجمهور، قال :"بعد ما صالحتها هي وباباها على بعض قولتلها عايزين نتصور أنا وإنتي وبابا وننزل الصورة عشان الناس فاهمة إن إنتي بنت عاق ومش واقفة جمبه فقالتلي لا لا أنا ميهمنيش الناس.. وبالنسبة لرجوعي لأم أولادي كل حاجة كانت بالاتفاق وأنا قولتلها إنتي رصيدك زاد عندي لما قولتلك ولادي ثم ولادي".