عبلة في "يوميات ونيس" تكشف سر خلافها مع محمد صبحي وانقطاعها عن التمثيل

روت الفنانة عبير صلاح الدين، الشهيرة  بـ"عبلة" في مسلسل "يوميات ونيس"، لأول مرة، تفاصيل خلافها مع الفنان محمد صبحي، وعدم تعاونها معه في الأجزاء الأخيرة من العمل.

وقالت عبير خلال استضافتها في برنامج "كلام الناس" الذي تقدمه الإعلامية ياسمين عز: "الحقيقة بتزعل، لو قلت الحقيقة هزعل ناس كتير جدًا، وهتهاجم جامد واللجان الإلكترونية هتدخل تروقني ومحدش هيصدقني، وهيقولوا هو اللي عملها بس ربنا شاهد وربنا عارف".

وتابعت: "بعد 10 سنوات رجعنا نعمل الجزء السادس، وكان حلو وفيه نجوم كثيرة، وعمل رد فعل كويس، الجزء السابع مكنش ينفع إننا نكمله، لإنه كان مط وتطويل وحصل فيه خلافات كتير وتوقف التصوير مدة 6 أشهر صورنا فيه شغل وناس اتخانقوا مع بعض فمشيوا واضطرينا نعيد التصوير تاني بدون أجر".

وأضافت: "كملنا الجزء السادس وإحنا في حالة شد وجذب وناس مشيت وناس قعدت، أنا كانت مشاهدي فيه صامتة، ولما خلصنا الجزء السابع بطلوع الروح، وأما قالوا هنعمل التامن أنا رفضت، فمحمد صبحي قالي إزاي تعملي كده؟".

خلاف حاد مع الفنان محمد صبحي

أما سبب عدم تعاونها مع الفنان محمد صبحي في الأجزاء الأخيرة من المسلسل، قالت: "الناس اللي قريبين مني قالوا لي إنتي الحل بتاعك حاجة واحدة، هي أنك تستسمحي الأستاذ محمد صحبي علشان تعرفي تشتغلي، قلت لهم لأ مش هعمل كده أنا مغلطتش".

وأكملت: "أنا قلت لا مش عايزة أكمل المسلسل، ده من حقي كممثلة إني مش لاقية نفسي في الدور، لإني مش هحرق الشخصية بعد نجاحها".

وأضافت: "دي كانت وجهة الاختلاف، وقالوا لي إنتي كده مش هتشتغلي خالص، وهتقعدي زي ما ناس كتير قعدت، فقلت الرزق على الله أنا ما غلطتش في حاجة أنا كنت بقول رأيي"، متابعة: "حاولت لحد ما جالي اكتئاب خمس سنين من 2010 حتى 2015 قاعدة في البيت وكل حاجة بتتقفل في وشي".