كلام ستات

زوجة تشكو: جوزي بيقولي يا ماما وحماتي زعلانة.. والتعليقات: مرارتنا!

الثلاثاء 30/أغسطس/2022 - 12:25 ص

ساندي جرجس

كتبت امرأة منشورًا مثيرًا للجدل على موقع التواصل الاجتماعي "فيسبوك"، تشكو من مشكلة مع حماتها بسبب كثرة دلال زوجها لها.

وقالت الزوجة في منشورها: "جوزي ديما بينده عليه بيقولى يا ماما أو مامي وإحنا متعودين على كده فا كنت النهاردة فى بيت أهله وأول ما شافني قلي وحشتيني يا ماما وطبعا حماتي سمعت الكلمة وخربت الدنيا، ماما ليه هي كانت حملت فيك تسع شهور ولا شطفتك أيام ما كنت عيل عمرك ما قلتلى مامي كنت بتقولى ياما".

وأضافت: "طبعا كل ما آجي أنا وجوزي نتكلم مش راضية تسمع، في الآخر جوزي قالي يلااا بينا ياماما على شقتنا ودي انفتحت فى العياط وقالتله يلااا يا بتاع ماما ما شفش وشك هنا، وجوزي بيحب مامته خالص وبيحبني خالص مالص أنا بقوله ما تقوليش ماما قدامها تاني قولي يا بنوتي أحسن علشان ما تتديقش، بس هو بيقولي إنتى روحي أنا، وأمي هتتعود أما إنتى مامي.. أنا اتصرف إزاي؟".

وكانت التعليقات بين ساخرة وأخرى تلوم على الزوج:

قالت غادة: «هو ايه الجو اللي بقى مليان جوزي بيحبني جوزي بيحبني انتو كده هتفتحو عنينا على حاجات مش موجودة في جوازنا خالينا نربي العيال».

بينما علق طارق: «بصراحة هو قليل الذوق وأمه مخها تعبان بس إنتى كنتي لازم تتدخلي وقتها وتقوليلها إنتي مش أمه لوحده، ده أنتي أمي أنا كمان، أنا أمه الصغيرة وإنتي امه الكبيرة، هتبصلك تقولك يعني بتقولي عليا عجزت تولع حريقة، اشوي عليها ذرة مشوي».

وعلقت سارة: «بس يا ماما .. دا إيه فقع المرارة اللي انتو فيها ده.. شوية إحساس على ذوق من عند عم عبده البواب أحسن منكم .. وإيه خالص مالص دي يابت.. ماتنشفي كده.. دي هي مرارة واحدة ياختي»

وقالت فاطمة: «ودى واحدة لسه جوزها راننها علقة عشان كلت ورك الفرخة بتاعه وجاية تفشر علينا عشان مفيش راجل بيقول لمراته ياماما غير يوم الصباحية لما يطلب منها الدهب، وتاني يوم بيسميها الجماعة، آل ماما آل، الله يرحم أبوكي، كان بينام ع السرير يوم وأمك يوم».