«بنتك المراهقة بتكلم ولاد؟».. إليك طريقة التعامل معها

تقدم الدكتور ياسمين المهدي، أستاذ طب الأسنان نصائح للبنات والأمهات، من واقع خبرتها كأم لـ3 بنات وتلقيها شهادات وكورسات في مجال التربية، وذلك من خلال حسابها الرسمي على "فيسبوك".

قدمت الدكتورة ياسمين المهدي عبر حسابها على فيسبوك للأمهات بعض الخطوات للتعامل مع مشاكل المراهقة وخصوصاً عندنا يصبح للبنت الرغبة في أن تتكلم مع أولاد، قائلة: "بلاش تواجهي ده بعنف، وحاولي تصاحبي بنتك علشان تيجي تحكيلك وتعرفي عنها كل حاجة علشان تقدري تحلي المشكلة معاها بهدوء".

  ‏

وتابعت: "لما تبقى 8 أو 9 سنوات وتسمعيها وهي بتتكلم عن أد إيه الولاد سخيفين أو لعبهم بايخ، متأكديش على كلامها بحجة إنها فرصة تكره الولاد وتبعد عنهم.. إنتي كده بتعملي حاجة خطر جدا، نفس الولاد اللي إنتي بتكرههيها فيهم دول، هما نفسهم اللي هتتمني بعد كده إنها تحب حد فيهم لما تبقى في العشرينات وتلاقيها قافلة من الرجالة.. متعمليش حاجة أثرها هيدوم طول العمر... اسأليها ليه هي حاسة بكده أو هما بيعملوا إيه؟ اسأليها إذا كلهم بيغلسوا ولا فيه حد مختلف و دي فرصة علشان تشرحيلها الاختلاف بين الشخصيات عموما و الاختلافات بين اهتمامات الولاد والبنات في السن ده، زي مثلا إن الولاد بيهتموا بالكورة واللعب ال physical في السن ده و البنات بتهتم بالكلام مع بعضهم والكلام في تسريحات الشعر واللبس والحاجات دي".

وأضافت: "ركزي أوي على مدحها لما تكون صادقة معاكي.. علشان من سن 12 فما فوق، إحنا محتاجين نبقى قريبين جدا من بناتنا، فركزي على موضوع الصدق بطريقة غير مباشرة معاها".

واستكملت: "لما تقولك أنا وعمر كنا بنعمل research مع بعض، متبرقيش وتبتدي تتحفزي، إنتي مدخلاها مدرسة مختلطة وإنتي عارفة إنها هتتعامل مع الولاد، اسمعي هما قالوا إيه وعملوا إيه وركزي على اللي بتحكيه اللي هو البحث ومتقاطعيهاش خالص وتبتدي تعلقي في الوقت ده على أسلوبها في الكلام معاه وإن ده ميصحش وإنها لازم تظبط نفسها وتخلي الكلام معاه في موضوع البحث بس".

وواصلت: "الخطوة الخامسة لما توصل لـ١٥ سنة، ابدئي فهميها قول الله تعالى: ( وقل للمؤمنات يغضضن من أبصارهن) أي: عما حرم الله عليهن من النظر إلى غير أزواجهن، وعلشان كده كتير من العلماء قالوا إنه: لا يجوز للمرأة أن تنظر إلى الأجانب".

وأضافت: "هل الموضوع بالسهولة اللي أنا كاتباها دي؟ أكيد لأ، وكل الكلام ده ممكن جدا إنه ميأثرش من أول ولا تاني مرة، لكن لما يتكرر كتير عليها بطريقة كويسة، هتلاقي تأثيرها كبير على المدى القريب والبعيد وهتلاقيها بتعمل حساب إن ربنا دايما شايفها".