كتبت زوجة منشورًا على موقع التواصل الاجتماعي "فيسبوك" تشكو من اتهام زوجها لها بالسرقة، معربة عن غضبها من ذلك ورغبتها في الطلاق منه.

وقالت في منشورها: «أنا جوزي اتهمني إني سرقت مبلغ مالي منه، وشتمني بأقذر الشتائم وقالي لو الفلوس دي مظهرتش هطلقك، اتصلت بأمه وأبوه وجم على الفور وطبعا البيت بقى عامل زي المسروق، وهو فارد عضلاته وهات يا إهانة، وأنا من كتر الانهيار حسيت إني هتشل، البيه بعدها ضرب على دماغه وقال يا نهار أسود ده أنا دفعت الجمعية امبارح اخخخخخخ، فضل يقول إن شكله داخل على زهايمر».

وأضافت: «الصراحة أمه بقت تبوس على دماغي، وأخته تبوس في إيدي ويطبطبوا عليه، ومشيوا، وهو قالي متزعليش، بس أنا زعلانة، زعلانة أوي، أنا مصدقة إنه نسي، والشيطان لعب بدماغه، بس أنا مش طيقاه، طلبت منه نبعد شوية أروح لماما كام يوم، رفض وبيغصبني على العلاقة الزوجية بالززززن، والإلحاح وأنا مش طايقاه يلمسني، أنا عاوزة أتطلق قبل ما أجيب منه ولاد، أهلي كلهم ضدي».

قالت سارة: «يا جماعة مش كل مشكلة نقول طلاق، وننصح بيه، أكيد فيه حل تاني وفرص تانية، بصي هو طبعًا غلطان، بس لو دي أول مرة افرضي حسن النية، طالما أهله راضوكي يابنتي، حقك تتضايقي وكمان تاخدي موقف، بس مش حقك تقصري كمان في حقوقه عليكي، حاولي تبعدي يومين عند أهلك وتهدي أعصابك.. أنتي كرامتك مجروحة بس حاولي تحافظي على بيتك».

اقرأ أيضًا..

مشكلة زوجة على سوشيال ميديا: «زوجي رومانسي بزيادة اعمل ايه» والتعليقات: «ده بطر على النعمة»

بينما علقت سناء: «طبعًا هو غلطان، موصلتش السرقة، وطبعا أنتي عندك مليون حق، لازم تاخدي موقف أنتي وأهلك علشان الموضوع ده ميتكررش تاني، والدك يشد عليه بكلمتين، وشوفي هدية يجبهالك علشان لما يغرم يحرم يطول لسانه».

وقال محمد: «لا حول ولا قوة إلا بالله هو غلطان طبعًا بس معلش هو وأهلوا راضوكي وممكن تسأذنيه وتروحى تريحي أعصابك شوية عند أهلك لغاية ما النفوس تهدأ، وبلاش تفكري في الطلاق، خراب البيوت مش سهل وربنا يصلح حالكوا».

وعلقت حبيبة: «روحي ريحي أعصابك شوية عند أهلك وحاولي تنسي اللي حصل، يمكن الزهايمر عنده جه فجأه وراح، حاولي تصدقيه وأمرك لله بس أجلي الخلفة شوية لحد ما تبقي مطمنة له».

وقال راجي: «تقدري تروحي بيت أهلك تريحي أعصابك وتهدي لأنه هو مش واثق فيكي خالص، ولا يؤتمن على العيش معه، وكمان بلاش أولاد مؤقتًا، وممكن تديله فرصة أخيرة بس تاخدي موقف حاسم معاه، استخيري وشوفي راحتك فين ربنا يصلح حالك».

بينما علقت وفاء: «يابنتي كلنا بننسى والفلوس بتضيع ونرجع نفتكر راحت فين وكل البيوت كده مش مشكلة، عدي عشان كله بيعدي ربنا يعوض عليكم الظروف وحشة مع الكل ربنا يرزق».

كما علق سعيد: «يا ستي راجل غلطان واعترف بالغلط بتاعه، أنا معاكي إنه غلط فيكي وده ميتسكتش عليه، المفروض يصلح غلطه ويتغرم بالمال على الفور».

اقرأ أيضًا..

فسخت خطوبتي بعد معاناة أربع شهور مع شخص شكاك.. والتعليقات: «صلي ركعتين شكر لربنا»