زوجة تشكو خيانة زوجها على النت.. والتعليقات تتآمر عليه

كتبت امرأة مشكلتها في منشور بإحدى صفحات موقع التواصل الاجتماعي "فيس بوك"، تشكو من خيانة زوجها لها، حيث اكتشفت أنه على علاقة بامرأة أخرى وتريد أن تجد حلا لمشكلتها.

وقالت في منشورها: "أنا في مشكله عاوزاكم تفهموني، أعمل إيه دماغي واقفة من التفكير، متجوزة بقالي سنتين وحامل وعلى وش ولادة، اكتشفت إن جوزي بيخوني مع واحدة وفي كلام بينهم ومعايا الدليل، أعمل إيه مش بيقعد معايا، بييجي من بره على الأوضه يمسك الموبايل شوية وينام، وطول ما هو في الشغل بيكلمها وفي برنامج بيكلمها عليه على أساس أنا معرفوش يعني".

وأضافت: "دخلت البرنامج شوفت كلام بينهم عملت اسكرين ومعايا، أنا دماغي مشلولة من التفكير، انصحوني يا بنات، ومش أول مره دي حصلت كتير، وقلتله دي آخر مره اسمحك فيها، ولو عملت كده هتطلق منك وآخر مرة حلف على مصحف ما يعمل كده تاني".

قالت منة: «متزعليش نفسك، النت والتواصل خسر وبوظ حاجات كتير للأسف، متخربيش حياتك ربنا يهديه لو قرب لربنا حيبعد عن القرف ده».

وعلقت أسماء: «متبينلوش حاجة واصبري لحد ما تضمني نفسك وابنك اللي جاي وتعملي حاجة ليكو وبعدين طظ فيه».

بينما قالت دنيا: «بصي فكري بالعقل لو أنتي فعلا مش قادرة تستحملي واجهي بس هتخربي بيتك لأنك لو رجعتي عن قرارك وسامحتيه هيتعبرها عادي وهيعمل كده على طول، خوفيه وخليه يعملك حساب وطالما حامل متخربيش بيتك الطفل ده ملوش ذنب».

وعلقت ميار: «تعرفي هي مين وتروحي تمسحي بكرامتها الأرض وياريت لو مكان شغلها أو عند أهلها وقدام الناس بالأدله اللي معاكي وتروحيله هو كمان تمسحي بكرامته الأرض وتدخلي حد كبير بيخاف منه ومتسبيش بيتك».

بينما قالت مي: «حبيبتي عيشي وانبسطى عيشي لابنك أو بنتك ومصى دمه خلصى فلوسه على طول لأنه طول ما هو مش معاه اللي يخونك بيه، الفلوس يعني، عمره ما فيه واحده هتبصله وكفاية عليكى طفل واحد وهو ربنا هينتقملك من عينيه متقلقيش».

وعلقت شيماء: «متواجهيهوش ولا تعامليه وحش اعملي أكونت تاني باسم راجل وابعتيله الاسكرينات وقوليله زي ما أنت جيت عليا أنا هبوظلك حياتك ومهكر تليفونك ومش هسيبك في حالك، خليه يتلهي في التفكير ويبعد عنها، حقك تزعلي طبعا بس حق البيبي اللي بينكم أنت تحاولي تحلي من غير ما تقللي من نفسك برضو ويعرف إنك عرفتي علشان ميبقاش أمر واقع».