رامي جمال يتحدث عن دعمه لـ«المطرب النقاش»: كلنا أسباب.. فيديو

كشف المطرب رامي جمال، عن أسبابه حديثه عن المطرب النقاش أحمد سالم، الذي سبق وأن كان حديث منصات التواصل الاجتماعي خلال الأيام الماضية، بعدما تداول المستخدمين، مقطع فيديو له وهو يغني أغنية للمطربة وردة الجزائرية " بكرة يا حبيبي" بصوت أشاد به الجميع عبر منصات التواصل المختلفة.

ونشر رامي جمال مقطع فيديو له عبر حسابه الشخصي على إنستجرام، بعنوان "كلنا أسباب لبعض" وقال خلاله: "أنا شايف القبول اللي ربنا كاتبه للفنان أحمد سالم، أحمد فنان بدرجة ما شوفتهاش في حياتي بصراحة مرتين تلاتة، أنا شايف القبول اللي ربنا كتبه والحب اللي أنتوا حابينه ليه، دي حاجة ما بتحصلش كل يوم".

واستطرد رامي جمال: "فرحان جدًا جدًا إن ما زال الصوت الحلو والفن الحقيقي الناس بتحبه وبتدعمه، فيه ناس كتير فرحانة وبتقولي شكرا إنك بتساعد أحمد، أنا مش بساعد أحمد، أنا بساعد نفسي كفنان وكملحن ومطرب برضو إن الوسط الفني لما يبقى فيه فنانين زي أحمد كدا وأصوات زيه، دي حاجة بترقى بالذوق العام، وحاجة بقينا محتاجينها كلنا".

وأردف: "ثانيا أنا اتربيت في بيت أهلي إن الفرصة لما بتيجي لحد بتبان إن ربنا باعتها، وإحنا كلنا أسباب لبعض، ممكن أنا أحاول أسهل مشواره في الفن، ودي حاجة بالنسبة لي قمة في السعادة". 

وعن الفيديو قال: "وقت ما شوفت الفيديو بتاع أحمد كان لسه ما انتشرش بالشكل دا؛ لأن فيه ناس بتقولي أنت بتساعد بس عشان التريند، والله عمرها ما كانت شخصيتي ولا هتبقى شخصيتي؛ لأن مفيش حد ضامن أنه يعمل حاجة ونيته مش صافية إنها في الآخر هتوصله للنتيجة اللي هو عاوزها".

وأردف: "بس أنا عاوز أقولهم حاجة لأن اللي باعتيلي كدا أكيد موهوبين بردو وأكيد مستنين الفرصة وأكيد مضايقين وشايفين إن الفرصة اللي ربنا إداها لأحمد والقبول اللي إداه لأحمد هما يستحقوه، بس والله بطمنهم، جايكلوا كلكوا الفرصة، الزرق من ربنا بميعاد، ولو ربنا سخرني لأحمد وسخر الجمهور له في إنه يبقى حابه ويساعده دلوقتي، فرصكوا كلها جاية حاولوا".

ووجه رامي جمال رسالة خاصة لمن يحصل على الفرصة حتى الآن: "عاوز أقول لكل الناس اللي ما أخدتش الفرصة، ربنا يديكوا أكتر من اللي اتمنتوه، وإن شاء الله زي ما ربنا وقفني لأحمد ووقف ناس ليا زمان، هيوقفلكوا ناس، جاي لرزقكوا ميعاد، وإن شاء الله لو ربنا كرمنا في مشروع أحمد" متابعًا: "دي حاجة هتشجعني أنا كرامي وهتشجع غيري من الفنانين، وعايز أشكر كل الفنانين اللي كلموني، وكل شركات الإنتاج اللي كلمتني عشان عاوزة تبقى موجودة في مشروع أحمد، والله العظيم أنا لو سعيد بحاجة، سعيد إني شايف إن فيه ناس بتحب الفن الحقيقي، لو طلع لنا 10 أو 15 صوت زي أحمد، إحنا المستفيدين كلنا في الآخر".

واختتم رامي جمال قائلا: "بقول لكل الناس شكرا لكل اللي عملتوه مع أحمد، أنا معملتش حاجة خالص لسه، وحتى بعد ما أعمل، أنا مش بعمل لأحمد، أنا بعمل لنفسي عند ربنا في فكرة إن مفيش حد هياخد زرقي، فاللي بيسهل لحد حاجة هيلاقي مليون واحد يسهله حاجات تانية، ربنا يكتبله الخير، وإن شاء الله الفترة اللي جاية يبقى فيه مفاجآت كتير، وبوجه لأحمد رسالة عن طريقكوا هنا كفاية برامج لو سمحت لحد ما تخلص الأغاني، يومكوا جميل".