فتاة تشكو: خطيبي عاوز الدهب عشان هساعد أختي بعد الولادة.. وتعليقات ساخنة

وكتبت الفتاة في منشورها: «عايزين حل حالا، خطيبي عاوز ياخد الدهب بكره عشان أنا عاوزة أروح أقعد كام يوم مع أختي وهي والدة ومفيش غيري اللي ينفع يقعد معاها، قالي لو روحتي وهتباتي هناك ابعتيلي الدهب، أتصرف إزاي أرجوكي ردي عليا قبل بكره».

كتبت بسنت: «اوعي تسيبي أختك أولا عشان هي والدة ومحتاجة حد يقف جنبها، وثانيا لأنها هيصعب عليها نفسها منك لو سبتيها عشان خطيبك، وثالثا هو ممكن يتغير إنما أختك لا، اوعي اوعي تسبيها وخصوصا لو هي معتمدة عليكي ومتفقة معاكي إنك هتروحي تقعدي عندها ومعاها، وموضوع الدهب عرفي أهلك وقوليله ابقي تعالي خده من الراجل اللي في البيت وعشان متحرجهاش قدام جوزها وأهله إنك سبتيها».

كما علقت شيري: «خليه ييجي ياخده قصاد أهل بيتك، أو وليّ أمرك يكلمه يقوله تعالى خده، ده ممكن ياخده و ينكر ده لو محصلش قدام أهلك وبعدين ده عِرة ومادي، فكك منه فعلاً و روحي لأختك ولو قالك حاجة قوليله روح لأهلي واعمل اللي أنت عايزه».

وكتبت هالة: «ابعتيلو يا حببتي يشبع بيه، أخت مبتتعوضش الرجالة مترمية في الشوارع».

وقالت آلاء: «عرفي والدك وخليه يكلم أبوه أو كبيرة أيا كان هو مين يقوله حصل كذا كذا واتفضلوا دهبكوا أهو وهو اللي لو قالك بعد كده نرجع تفي في وشه».

وقالت أسماء: «خلي أختك تيجي تقعد معاكم عند مامتك علشان حتى تبقي براحتك معاها لو تقدر يعني لو منقدرش خلاص فكك منه واقفي مع أختك هي الي باقيالك ده دماغه وجعاه».