روبي: نادمة على ما فعلته في أمي.. وحبيبي تركني بسبب "ليه بيداري كده"

حلت الفنانة روبي ضيفة في برنامج "معكم" مع مني الشاذلي أمس، وتحدثت عن حياتها الشخصية ومسيرتها الفنية وعلاقتها بالشاعر والملحن عزيز الشافعي في لقاء مليء بالمزح والألعاب.

تحدثت روبي عن علاقتها بعزيز الشافعي، قائلة: "اتخانقت معاه في البداية قبل أغنية حتة تانية، وكنت بقوله إيه هوبا دي؟، عايزة كلام فيه معنى، وإيه فيستك دي!، حقيقي نفسي أدخل دماغ الراجل ده أشوف فيها إيه".

وتابعت: "مش عارفة الناس ممكن تستغباني ولا لا، أنيا كنت خايفة من كلمة هوبا، بس اكتشفت إن عزيز عارف دماغ الناس أكتر مني وكلمة هوبا أكتر حاجة علقت مع الناس".

وأوضحت أن اسمها الحقيقي رانيا واستبدلته بروبي، قائلة: "كنا بنصور فيلم سكوت هنصور مع يوسف شاهين، هو بيحبني أوي وأنا كنت شغالة معاه في الثانوي، وقالي فيه رانيات كتير أوي في السوق، هسميكي سحر، وبعدما اعترضت على اسم سحر، فسماني روبي".

وعن دخولها مجال التمثيل، قالت روبي: "دخلت المجال كموديل إعلانات عشان أجيب فلوس أصرف بيها على دروسي في الثانوية، ومكنش طموحاتي الشهرة، أنا كان طموحي أتجوز وأقعد في البيت وتبقى حياتي تقليدية".

روبي طفلة متمردة

وعبرت روبي عن طفولتها المتمردة وعلاقتها بوالدتها قائلة: "كنت طفلة متمردة مقدرش أعتمد على حد ولا أقول لحد عايزة حاجة، كنت أنانية جدًا لدرجة إني خليت أمي أرملة سنين كتيرة ورفضت إنها تتجوز بعد ما والدي مات، ودلوقتي ببقى عايزة أضرب نفسي ميت جزمة لأني ظلمتها".

روبي في التمثيل

وأوضحت روبي أنها دخلت مجال التمثيل بعد مقاطعة خالاتها لها قائلة: "بعد أغنية ليه بيداري كده، حبيبي سابني لأنه مكنش هيستحمل ردود فعل المصريين على الأغاني بتاعتي، وخالاتي قاطعوني وقاطعوا أمي وقالولها إزاي موافقة بنتك تعمل كده".

وتابعت روبي: "وقفت فترة علشان أدرك اللي كنت بعمله وأقدمه، وقررت بعدها أدخل التمثيل عشان أثبت إن روبي مش رقصة ولا أغنية".