«الكابو أكبر منك» تفاصيل خناقة نجل حميد الشاعري.. وحلمي بكر يرد: «أبوه يربيه»

مازال الصراع بين الموسيقار حلمي بكر، والمطرب والملحن حميد الشاعري قائم بل وازداد بتدخل طرف جديد وهو نديم حميد الشاعري نجل الفنان الذي هاجم بكر، بمنشور عبر صفحته على الفيسبوك منذ أيام..

نشر نديم على صفحته قائلا: "أستاذ حلمى لو محتاج مساعدة ماديا أو نفسيا الكابو -حميد الشاعري- مش حيتأخر عليك، لكن ما ينفعش كل ما تتزنق تروح برنامج تجيب سيرة حميد الشاعرى الى للأسف تاريخك ميجيش تمن تاريخه ولا فنيا ولا أخلاقيا للأسف، ٣٠ سنة من عمرى ما بيعملش حاجة فى حياته غير التقليل من الناس ومن الفنانين ومن أعمالهم".

وأضاف: "أوعى حضرتك تفتكر إنك محطوط في خانة الإنسان المحنك، لا للأسف، فرق كبير أوى بينك وبين الكابو حتى في الفكر الموسيقي والمعاملة مع الناس. الكابو كبير مقامة ومش بيرد عليك عشان هو اكبر من كده واكبر منك بالذات، ودايما بيقولى ما تردش على حد. لكن ولاده كبروا ومش حيسمحوا انك تقطع في ابوهم».

وتابع: «هو حضرتك بجد فاكر أن حميد هو اللي بوظ المزيكا في مصر؟ المقسوم إلى حضرتك بتتكلم عليه هو اللي واكل بقاله ٣٠ سنة مع كل الفنانين، وهو سر الاستمرارية والنجاح، مفيش البوم بينزل غير ومقسوم الكابو رانن في الودن".

ليعود حلمي بكر، في تصريحات لقناة النهار متهماً الفنان بتدني مستواه الفني قائلاً: "حميد الشاعري كان بيلبس كوتشي مقطع، ودا وصلنا لمأساة، نحن كموسيقيين تقبلنا المدارس المتنوعة، وحميد الشاعري جاء بلون كان جميل وخفيف على الشباب، ولكن مظهر الفن كان لا يليق بجوهره، كان بيطلع لابس ترينج وشبشب أو كوتشي مقطع، وهو دا اللي وصلنا اننا بقينا نسمع شاكوش وبنسة ومفك، إحنا في مأساة بجد".

وكان تعليق حميد الشاعري، مع منى الشاذلي عن حلمي بكر، تاريخ لكن كان هجومه على شخصي وعلى مشروعي زيادة شوية لمدة 10 سنين، وأنا لم أرد".