«الستات الشاطرة بتعمل ايه».. أبرز أسئلة المتزوجات على فيس بوك والتعليقات: «تنكد عليه»

كتبت إحدى النساء المتزوجات منشورا على موقع التواصل الاجتماعي تتساءل فيه عن مواصفات «الست الشاطرة» التي يحبها زوجها على أن تكون منهن طوال الوقت.

وكتبت تلك المرأة: «جوزي كل ما يكلمني يقولى روحي شوفي الستات الشاطرة بيعملو إيه .. انتوا بتعملو إيه يا جماعه؟».

وكانت التعليقات أغلبها بسخرية وانتقاد لرأي زوجها، حيث قالت جنا: «اقولك انا بقى الستات الشاطرة بجد بتسيب البيت يضرب يقلب وتريح نفسها لان كدة كدة مش عاجب الستات الشاطرة بتخلي جوزها يجبلها كل الي هي عايزاة ومنكدة عليه عادي جداا هي دي الشاطرة في الزمن ده».

بينما قالت فاطمة: «بنعمل عبط وبناكل المستهبلة بمزاجنا علشان نقدر نستحمل قرفهم وعيشتهم اللي تسد النفس».

وعلقت وعد: «انا كنت بعمل كل حاجه تريحه وتسعده وكان دائما يتولى انت يعنى بتعملى ايه قررت الانفصال وصممت عليه وبعد الانفصال ماشى فى كل مكان يقول محدش زيها ولا حد فى الدنيا يقدر يستحملنى زيها ولا حد فى شطارتها».

وقالت وسام : «ده بيحاول يقلل منك علشان مش بيحب يشكر على لحاجة الحلوة لما يقولك كده قوليله ايه يريحك و يريح قلبك و انا مش هتأخر و ملناش دعوة بحد علشان لما تيجي تتطلبي حاجة هايقولك ملناش دعوة بحد».

كما علقت إيمان: «وهو متعصب اسكتي وسيبيه وهو رايق دلعيه واطلبي اللي انتي عوزاه وهو ف أزمه اقفى جمبه وهوني عليه وبلاش لوكلوك وبلاش زن وقولي حاضر علطووووووول ساعتها هتكسبيه».

وقالت سوسو: «بيعملوا اكلهم وبينضفوا بيوتهم وبيذاكروا لولادهم وينزلوا يجروا من توصيل مدرسه لدرس لطلبات لمستشفيات للام والحماة والعيال وشايلين البيت علي اكتافنا وبنستحمل الظروف ومنطلبش فوق الطاقه وبنطبطب وبعد كده مع اول وقعه او غلطه تستني تتشالي علي الراس تلاقي نفسك بيتقالك لزمتك اي يبقى اعملي زي كل الستات ضيعي طاقتك وصحتك هدر».