بعد عضة الكلب في منطقة حساسة.. رحمة حسن تكشف عن تطورات حالتها الصحية

كشفت الفنانة رحمة حسن، عن تطورات حالتها الصحية بعدما تعرضت لعضة كلب شرس في منطقة حساسة، خلال الفترة الأخيرة.

وكتبت رحمة حسن عبر حسابها الشخصي على موقع "إنستجرام" :"للأسف إحنا عملنا اللي علينا ومحصلش أي جديد بخصوص الكلب، وكل شوية تأجيل تأجيل، بداية بإن مفيش مكان عاوز يقبل الكلب لأن سنه 4 سنين ونص، لحد إن شاء الله بعد العيد نبقى نجيبله مدرب البيت بس لسه مش عارفين إمتى".

وأضافت رحمة حسن في منشورها: "حبيت بس أشارك معاكم اللي حصل، إمبارح كانت آخر حقنة ليّا، وطبعا بعدها تعبانة لمدة يومين ومن أسبوعين فاتوا، بعد الحقنة الرابعة دخلت المستشفى بالليل لأني كنت تعبانة جدا بعدها، لو الكلب كان مدرب أو عارف إن مينفعش يهجم على إنسان من الأول مكنش كل ده حصل، وللأسف مفيش مسؤولية".

والجدير بالذكر أن رحمة حسن قد أعلنت في شهر يونيو الماضي عن تعرضها لهجوم عنيف من كلب شرس، حيث كتبت وقتها :" كنت نازلة أجيب حاجة من السوبر ماركت جمب البيت، كنت ماشية على الرصيف وكان في عربية بتركن جمبي عادي، فجأة الباب اتفتح ولقيت كلب جيرمن شيبرد بيهجم عليه بكل قوته، طبعا حاولت أجري لكن للأسف الكلب كان قوي وشرس ووقعني على الأرض، حاولت أقوم وأجري وصاحبته حاولت تشده، بس فك الوش بتاعه وعضني عضة كبيرة وغويطة بنابه في منطقة حساسة".

وأضافت رحمة حسن في ذلك التوقيت: "صاحبة الكلب كتر خيرها أخذتني فورا على مستشفى إمبابة، ادوني حقنة تطعيم الكلب ولسه فاضل لي ٤ هاخدهم خلال شهر، بس المشكلة أن من امبارح الجرح بينزف دم كتير، وأنا طبعا خايفة ومصدومة وتعبانة وعندي تروما من امبارح واللي واجعني أكتر أني مَش عارفة أتصرف إزاي، خصوصا أني أكيد مَش عايزة الكلب يتأذي، بس كمان مَش عايزة أي إنسان كمان يتأذى ويتعض ويتبهدل في الشارع زيي".

وأردفت: "أنا كنت بشوف الكلب ده دائما مع صاحبته بتمشي بيه في الشارع جمب البيت عندي، وعشان شكله شرس كنت بمشي بعيد عنه لما بشوفه، امبارح صاحبة الكلب قالت لي متخافيش هو عض ولادي قبل كدا وتمام محصلش حاجة، طبعا أنا اتصدمت لما عرفت أنها مش أول مرة الكلب يعض حد، ومع ذلك هي سايباه عادي في الشارع من غير كمامة أو حد قوي يمسكه، بجد حرام عليكم، الكلب لما بيكون حجمه كبير وشرس بيعتبر سلاح، وصاحبه مسئول مسئولية كاملة عنه ويحاسب على إهمال مسؤليته، خصوصا لو إهماله تسبب لشخص تاني في أذى بدني يحتاج أكتر من ٢١ يوم علاج، وأذى نفسي ماعرفش هايحتاج قد إيه عشان يخف".

واختتمت الفنانة رحمة حسن حديثها وقتها وقالت: "أنا كنت بحب أنزل أحط أكل ومياه للكلاب والقطط تحت البيت، دلوقتي أنا حقيقي مرعوبة أقرب منهم وخايفة جدا.. أنا أسفة طولت عليكم بس أنا بجد مَش عارفة المفروض أعمل إيه عشان محدش تاني يتأذي".