عروسة تستغيث على فيسبوك: «أخت خطيبي عاوزة تطفشني أعمل إيه؟»

وقالت الفتاة في منشورها: «هو لو اخت خطيبى بتحط بوستات تلقيح وبتحاول علطول تقنعه انه يسيبني وانى مأثرة عليه وانى غسلاله دماغه واول معرفته كانت بتحاول تتقربلى بس مش حب تنزل فيا اسأله و مبتحترمش أى خصوصيات وعايزة تبقى رجلها على رجلنا فى كل حاجة و بتقول كلام دبش كتير كلام كله يحرق الدم و كل مخرج معاه تقعد تتصل كل مرة من غير أسباب مهمة وكانت خاربة على أخوه الأكبر جوازته قبل كده سنين وقفت له فى جوازته من البنت اللى حبها".

وواصلت: "اخر موقف كنت بتخانق فى التليفون مع خطيبي، وهو فى اوضته، راحت سمعت المكالمة ووصلت اللى سمعته لاهلها وقلبتهم هما كمان و والله عمرى معملتلها حاجة أو دوستلها على طرف فى كل اللى حصل ده مفيش مرة حتى رديت بحاول اقتصر منها ومفيش حد فى البيت عندهم بيغلطها انا خطيبى شخص كويس اوى وحباه بس وصلت انى مش طايقه اكمل تعبت منهم هو اخد موقف قوى منها بعد محاول يتكلم معاها و مفيش فايدة وبيقولى منتعاملش معاها هو ده عادى هعرف اكمل حد مر بنفس الحوار بجد قلقت منها".

كتبت هاجر: «حبيبتي سبيه لو هو مبياخدش معاهم موقف حياتك هتبقي جحيم معاهم متحايليش ولا تدادي ف حد مش مغليكي وهو اللي بيدور يسعدك متبقيش انتي اللي بتدوري وتنكشي عشان تصلحي انتي غاليه انا دائما بفكر نفسي بالكلميتين دول طالما انتي بنت ناس متخليش واحده زيها تتحكم فيكي وفي عيشتك بعدين».

وقالت زهراء: «انا رأيي ان طالما هو في صفك وواقف معاكي يبقى خلاص اسمعي كلامه ومتتعاملوش معاها وهو هيعرف يجيبلك حقك منها في أي موقف لو بيعوم على عومها وسايب الدنيا كدا هقولك اه تبعدي لكن واضح انه كويس».

وعلقت روان: «لو خطيبك ودني و بيسمعلها سيبه انما لو شخصيته قويه و حاكم الدنيا كملي ومتحطيهاش فدماغك ومتشوفيش بوستاتها ولا اكنها موجودة».

وكتبت هايدي: «احسن حاجه انك تبعدي عنها وملكيش علاقه بيها وعلاقتك بخاطيبك أهم حاجه وابقي اسالي عن امه وابوه وخلاص ولو حد كلمك عن مشاكل بينكم قولي محصلش حاجه انا وهو كويسين الحمدلله وادعونا».

وقالت إيمان: «كون أنها إنسانة مبتعرفش ترد على حاجه غير باالتلقيح كفيل انك تكبرى دماغك منها خالص اصلا ولا كأنها موجوده».

وعلقت ميار: «دلوقتي بيعمل كده عشان انتوا ع البر ومضمنكيش فعايز يبينلك أن محدش منهم يقدر ييجي جنبك».