«النصيحة على الملأ فضيحة» هجوم على عروسة كتب الكتاب.. وهي ترد : «شكرا لكل التعليقات السلبية»

أثار فيديو لفتاة أثناء عقد قرانها جدلًا واسعًا بين رواد السوشيال ميديا، بعدما طلب منها المأذون التوقيع على عقد الزواج ولكنها طلبت إلقاء كلمة وتوجيه شروطها للعريس.

وكانت العروس طلبت إلقاء كلمة قبل التوقيع على عقد الزواج، وأوصته خلالها باحترام أهلها، كما ستحترم أهله خصوصًا أمها.. 

عروسة كتب الكتاب 

وقالت عروس كفر الدوار لـ«العريس» أمام المعازيم في الفيديو المنشور على صفحتها: «أنا واثقة في ربنا وفيك، وإنك هتكون خير الزوج والصاحب والسند، وماندمتش في يوم إني اخترتك، ولكن بالعكس إنت أفضل وأعظم انتصاراتي في الحياة».

وتابعت" زى ما احترم أهلك وأحطهم فوق راسي تحترم أهلى وتحطهم فوق راسك ومع احترامى لأى حد ..أمى ثم أمى ثم أمى".

تعليقات السوشيال ميديا 

وقال إسلام شمس الدين أن " المرأة أقوى من الرجل، وأحد أهم أسرار قوتها أنها أكثر رقيًا وتهذيبًا في معاملاتها وسلوكياتها، وأكثر سموًا في لغتها الكلامية والجسدية، وأكثر مراعاة لمشاعر الآخرين وأقدارهم، وأكثر حرصًا على اتباع قواعد الإتيكيت في التعامل مع البشر والمواقف.

وتابع، "وأسرار قوة المرأة هي الدرع الواقي لها من سهام الآخرين باللسان أو النظرة أو الفعل، فإذا فرطت في أيٍّ منها؛ جعلت من نفسها "ملطشة" لكل من هبَّ ودبّ".

تعليقات سلبية على حادثة فتاة كفر الدوار 

ووجهت ايمى عادل عدة أسئلة للعروس قائلة، ايه الفايدة انك تكلمي خطيبك اللي هو أصبح جوزك بمجرد كتب كتابك بالطريقة دي ؟ وإيه الفايدة انك تكلميه قدام الناس وقدام أهله وأهلك بالشكل ده ..

وليه مكانش الكلام بينك وبينه، مانتوا اتفقتوا على كل حاجة واشتريتوا كل حاجة؟ وليه محاولتيش تتكلمي بصوت واطي وأسلوب مهذب عن كده؟ .. أي نعم أغلب مطالبك مشروعة مافيش مشكلة، لكن أسلوبك كان سيء جدا.. وكمان انتي اللي نشرتي الفيديو بنفسك. على سبيل الفخر مثلا .. ؟

النصح على الملأ فضيحة

وقالت مريم علي،"مكنتش حابة اتكلم على موضوع عروسة كفر الدوار بس لاقيت بنات كتير بتدعمها

اولا: يا بنتي لو كان غرضك النصح فالنصيحة على الملأ فضيحة، انتي منصحتيش انتي فضحتي بس فضحتي تربيتك وأهلك والراجل اللي انتي قلت له أعظم انتصاراتي.. فين الانتصار ده لما تلاقيه بالمنظر ده أدام الناس وخصوصا انك صورتي فيديو ونشرتي أو سمحتي بنشره وانتي عارفة يعني ايه نشر علي الفيس بوك.

ثانيا:  يا بنتي لما انتي وحيدة وخايفة انك تبعدي عن اهلك اتجوزتي ليه وبتبني بيت تاني ليه واخترتي سند ليك غير ابوكي ليه.

ثالثا: يا حبيبتي هو مش مجبر يحط امك فوق دماغه ولو حطها يبقا بسببك لما يلاقيكي ست بجد ومتربية ويبقا بيكرمك في امك... وخلي بالك من حقه يمنعك عن اهلك لو تعارض ده مع مصلحة بيته.

رابعا : ايه الصابع اللي عايز قطعه وطريقة كلامك انتي مش داخلة حرب وعيب انتي ما احترمتيش اهلك ولا ابوكي ولا الرجالة اللي واقفين.

خامسا تعليقاتك في المواقع عيب بصراحة وبتدينك وتأكد انك فعلا عايزة شهرة.

سادسا انتي ازاي هتكوني ام وتربى بنت هتكون زوجة في يوم او ولد هيكون زوج.

هى غلطت في إيه؟

ومن التعليقات الداعمة، قال فتحى أحمد، رجالة هي البنت دي غلطت في ايه تتهاجم عليه ده كله ، واحدة بتقوله أنت أعظم وأفضل اختياراتي وبتطلب منه يرعي أهلها زي ما هترعي أهله لا تطاولت عليه ولا قالتله أمه نوديها دار مسنين ومتقعدش معانا. 

وبعدين بتقول أمي ثم أمي ثم أمي دليل علي حبها لمامتها ولو انتوا شايفين ان هي قصرت في حق والدها فهي قالت وحبيبي كمان عشان ميزعلش ، أنتوا بتهاجموها عشان بتتشرط عليه يرعي أهلها ولا عشان إيه ، بنت جميلة وعفوية شكلا ومضمونا وباين عليها محترمة ، ربنا يهديها لجوزها ويخليهم لبعض".

تعليق العروسة

وعلقت العروس على صفحتها قائلة، "شكرا لكل التعليقات السلبية بجد". ونشرت فيديو لها عقب إتمام عقد القران وكتبت "ع عيني يانور عيني، وهيفضل بابا سندي الأول والأخير بعد ربنا.. فكرة انك تطلعي من تحت جناح ابوكي فكرة مخيفة جدا والله".

اقرأ أيضًا..

«عروسة كتب الكتاب» فتاة كفر الدوار تتصدر التريند بشروط زواجها قبل عقد القران