75% نسبة الاشغالات السياحية بشرم الشيخ
فتاة: «حماتي متدخلة في حياتي أعمل إيه؟».. ونصائح البنات: «بتغير عليه سيبهولها»
الإثنين 09/مايو/2022 - 12:07 ص
ساندي جرجس
كتبت فتاة منشور على أحد جروبات النساء على موقع التواصل الاجتماعي "فيس بوك" تشكو فيه من حماتها وتدخلها في علاقتها مع خطيبها، مشيرة إلى مخاوفها من ذلك بعد الزواج.
وقالت الفتاة: «بنات هو الطبيعي أن مامته تبقى مدخله أوي في حياتنا، هي مش بتكلمني بس حرفيا كل حاجه تاخد جنب وبحسها مضايقه كدا نبقا بنتكلم تفضل تزعقله وتقوله خف شويه نام بقى واحنا مكملناش دقيقة، والله بنتكلم حتى مش فاهمه ليه كدا انا معملتهاش حاجة».
- بتغير عليه
كانت جميع التعليقات تحذر الفتاة وتحثها على ترك خطيبها لوالدته التي سوف تتسبب في مشاكل كثيرة بينهما، وقالت يمنى في تعليق: «بتغير عليه سبيهولها بقى».
بينما علقت ميار: «اوعي تتجوزي في بيت عيلة هتشوفي المر، الوكسة لتجي تقعد عندك»، وقالت مروة: «وهو رد فعله اي بيقفل معاكى ولا لا ؟؟؟ هيا مش غيرة على فكره كل الأمهات بتغير على عيالها ومش طبيعى أنها تقوله كدا».
وقالت رضوى: «غيرانه سيبهولها»، بينما علقت سمر: «اهربببببببي»، ونصحتها مرام: «كبرى دماغك منها فى أمهات بتغير على أولادها لو وقفتى ع تصرفاتها مش هتخلصى اعملى نفسك مش واخدة بالك».
عادي كبري دماغك
وعلقت أيضاً نورهان: «عادي كبري دماغك اهم حاجه هو ميكونش بيمشي وراها زي الأهبل لو ليه شخصيه عمتا متقلقيش وعااادي جدا».
وقالت سارة: «نعم؟! ايه العبط ده سواء غيرانه أو مسيطرة عليه وملهوش شخصيه ف انتي هيطلع عينك».
هتخرب عليكي
بينما علقت ريم: «جوازة سعيدة حماتي كانت كدة ومختش بالي غير لما اتجوزت وخربت عليا واطلقت وانا عروسه كام شهر منهم لله بجد الي زي كده».
وحذرتها بسمة: «لا مش طبيعي وابعدي احسنلك عشان دي هتبقي أسوأ من الضرة وهتوريكي النار ال جواها بجد».
وقال مي أيضاً: «اوعى يابنتي اوعي بلاش ابن امه لا الى امه بتدخل فى حياته لا الى امه فارضه نفسها فى حياته لا بيت عائله لا كل ما كانت العلاقات بحدود هتبقى الدنيا تمام وكويسه لكن انها تدخل كده حاجه رخمه».
اقرأ أيضًا..
