«مبادرة شبكة فضة»| رجل يُطالب بإلغاء الذهب.. والسيدات: «اقعدوا من غير جواز»

أطلق رجل مبادرة جديدة على موقع التواصل الاجتماعي "فيس بوك"، يدعو فيها البنات لقبول الزواج بشبكة من الفضة، وذلك بسبب ارتفاع أسعار الذهب وعدم قدرة الشباب على الزواج لهذا السبب.

وقال الرجل في منشوره: "مبادرة شبكة فضة.. انطلاق مبادرة شبكة فضة لتيسير الزواج.. سهلوا الحلال حتى يصعب الحرام".

وكانت التعليقات بها من يوافق على المبادرة ويدعمها وكانوا قليل من النساء، ولكنه واجه هجوم كبير من عدة نساء رفضن تلك الفكرة تماما.

وكتبت إحدى الأمهات في التعليقات: «يارب ارزق بنتى فى هذه الأيام بابن الحلال ومن اسرة طيبة وليس مهم شبكة ذهب ولا فضة أو دبل فقط».

ولكن سلمى علقت قائلة: «طيب وأولا بعيدًا إن تبديل الذهب بالفضة خطوة عظيمة وأنا معاها جدا كمان، بس الأب إلي هيسهل لخطيب بنته أمور الزواج بعد ما يجوز بنته هيسهل لها حياتها ويعاملها بما يرضى الله؟ ولا قدر الله لو انفصلوا هيرد لها حقوقها كاملة ؟ ولو ده حصل هيجمع لها عفشها وحاجتها ويوديها لحد بيتها ولا هيرمي لها الحاجة في الشارع عشان تستلمها بطريقة قانونية في منظر مؤلم جدا، أعتقد تسهيل الزواج على الزوج لازم يقابله ضمانات كافية لحقوق الزوجة».

وقالت منى: «مش بالدهب أهم حاجه السعادة وراحة البال». 

وعلقت سمر: «النبي عليه الصلاة والسلام قال إذا جاءكم من ترضون دينه وخلقه فزوجوه مقالش عربيه شقة ملك مقالش فرش دمياطي مقالش قاعة بمبلغ وقدره والله لتسألن يومئذ عن النعيم».

كما علقت آمال: «أتفق جدا لكن للأسف طيش واستهتار الشباب هو اللى يخليك متقدرش تسهلهم الدنيا يمكن يحاول يحافظ على حاجة تعب فيها.

بينا قالت دينا: «عمرها ما كانت بالدهب كلها شكليات المهم الراجل المحترم».

 

وعلقت خلود ساخرة: «ما تقعدوا من غير جواز وخلاص مش مستاهلة الدوشة دي والله».

بينما قالت رضوى: «يعنى مصر الدولة الوحيدة فى العرب كلهم إلى العروسة بتساعد فيها النص بالنص وكمان عايزين تتجوزهم بشبكة فضة طب البنت إلى بتجيب 150 فوطة وحاجات مش موجودة فى الموجود الأولى بيها أنها تساعد أبوها إلى بيفضل يسدد فى الأقساط لحد أما يبقى معاها عيال الحمد لله على نعمة النوبة والله».

وهاجمته سارة قائلة: «طبعًا لو قولنا اننا موافقين هتلاقي الناس اللي حافظه أن التعدد ربنا رخصه وهيروح يتقدم ل٣ غيرك بفضة يا سكر».