أسئلة البنات على السوشيال ميديا.. «تتجوزي اللي ملوش تجارب ولا اللي لف ودار؟!»

وضمن تساؤلات البنات على مواقع التواصل الاجتماعي حول الخطوبة والزواج، نشرت إحدى الفتيات سؤال على جروب البنات على "فيس بوك" وكتبت فيه: «تتجوزي اللي ملوش تجارب ولا اللي لف ودار كتير؟!».

واختلفت الآراء للبنات حول ذلك السؤال، فهناك الكثير اختار الشاب الذي لم يسبق له خبرات والبعض اختار الشاب الذي له خبرة وتجارب مع البنات.

وعلقت كرستين على المنشور قائلة: «ولا ده ولا ده اخد ابن الأصول المتربى والمعدن النظيف بجد، ويكون راجل وقد المسؤوليه واللى يقدرنى ويحترمنى الخلاصه اللى شارى بجد ومستعد يعمل اى حاجه علشانى».

وقالت ليلى: «هو مفيش يعني خيار وسط بني آدم طبيعي شاف من الدنيا بحكم خبرات الحياة و ظل متمسك بمخافة الله فب قلبه و أفعاله».

بينما علقت هايدي: «طريقه السؤال مش حلوه أصلا بس ما علينه..... اى بنت ف الدنيا عاوزه تاخد ابن الأصول اللى متربى على مبادئ وأخلاق مش ممكن يكسرها.... اللى يكون راجل بمعنى الكلمه ... صاحب فكر وقرار حر .... صاحب شخصيه متزنه .... يكون حنين عليها ويصونها ويحترمها... ويعرف كويس اوى أنه كرمتها من كرامته... ويعرف كويس اوى أن اى حد ف الدنيا اتنين الا هما واحد ... ويصير الإثنان جسدا واحدا وميبقاش فى بينهم تالت ... دايما المبادره بالاهتمام والحب بتيجى من الراجل.. فلما هو يتعامل معاها بحب اكيد هيجنى ثمرة حبه دى معاها وهتستحمل كل صعب معاه».

وقالت مريم: «اية موضوع لف ودار كتير في اسمها بتاع بنات و صايع وبيضحك علي البنات وفي ممكن واخد كويس جدا بس شاف كتير ومحصلش نصيب اهم حاجة يكون كويس مش صايع حتي لو شاف كتير تفرق في المعني لان كل الناس سواء بنت او ولد متعرض يمر بتجارب كتير».

وعلقت سمر: «إلى لف ودار لانة شبع المشكلة فى إلى ملوش تجارب عاوز معاملة خاصه من مراتة اهتمام زيادة لو مافيش الاهتمام دة ممكن يعمل علاقات».

بينما قالت سارة: «هو ليه يا ابيض يا اسود ماهو اللى ملوش تجارب ده فى الاغلب مشاعره بتبقى عاملة زى مشاعر الولد المراهق مسيطرة عليه و فى الاغلب مبيعرفش يفكر بواقعية، و اللى لف و دار ده فى الاغلب مشاعره بتبقى مستنزفة فطبيعة علاقته بالطرف التانى بتبقى مش صحية بيكون معظم الوقت انانى فى العلاقة ومش قادر يشوف شريكه، لكن الوسط اللى بيكون عدى بعدد معقول من التجارب ده فى الاغلب كل علاقة بيدخلها بياخد منها خبرات تكبره وتخليه يتعامل بطريقة متوازنة اكتر فى العلاقة اللى بعدها حتى طريقة اختياره لشريك حياته بيكون فيها نضج اكتر».