مشاكل الأمهات على السوشيال ميديا.. «بنتي بتحب حماتي أكتر مني أعمل إيه؟!»

فنشرت إحدى النساء مشكلتها، قائلة: « أنا بنتي لسه عندها شهر وحماتي من وقتها لازقة عندي في البيت عشانها لدرجة إن بنتي كل ما أخدها منها تفضل تعيط وأصلا هي بترضع صناعي، المهم حماتي مش وحشة معايا بس في النقطة دي هي وابنها بيغيظوا فيا وتقعد تقولي بتحبني أنا مش عايزاكي وكمان عاملة حسابها تفضل راحة جاية عليا وتربيها، عمالة تقولي دي شوية كدا وهعملها كذا وهخليها تبقى كذا أعمل إيه عشان بنتي تحبني وأعمل إيه عشان حماتي متدخلش فيها بالطريقة دي دا غير إني من بعد الحمل مش طايقة نفسي وحاسة عايزة أهرب من الدنيا ف إيه».

وجاءت التعليقات تشجع تلك الحماة على ما فعلته وتثني على دورها مع حفيدتها وزوجة ابنها، وبعضهن وصف ما تشعر به تلك الأم بأنه اكتئاب ما بعد الولادة.

فعلقت ياسمين قائلة: «مشاعرك دي طبيعية جدا وشويه كده هي هتزهق متقلقيش ماحدش بيربي عيال حد ولا هتفضل شايلاها كتير كده، دي بنتك وعمرها ماهتحب حد قدك إطمني».

بينما علقت هيام: «بصي هي بنتك مش هتكرهك ولا تحب جدتها أكتر منك لأنك ببساطة مامتها وعمرها ما هتحب حد قدك، بس هي فرحانة ببنت ابنها خصوصا لو أول حفيد عندها هتبقى عايزة تعملها كل حاجة وتجيبلها كل حاجة خدي الأمور بصدر رحب واضحكي وهزري معاها كلمة حلوة هتكسبيها خصوصا انك بتقولي أنها كويسة معاكي فملوش لازمة كل اللي بتعمليه دا عشان الدنيا متتعكرش ما بينكم، وعلى فكرة لما بنتك تكبر تبقى 6 ولا 7 شهور كدة هتتمني حد ياخدها منك ويريحك شوية واعتقد مش هتلاقي أحسن منها واللي زي دي صدقيني تتشال فوق الراس».

وقالت ريم: «ده اكتئاب ما بعد الولادة اقري عنه وشوفي طرق تساعدك للتخلص منه أما موضوع حماتك ف يا بختك لأن على كلامك انتي إنها حد كويس معاكي وشايل عنك شويه».

وعلقت منة: «حماتك بتحبها وفرحانة بيها يمكن كانت بتتمنى بنوتة وربنا رزقك انتي بيها سبيها تفرح وتلاعبها أصلا شوية كده وبنتك هتعرفك وتعرف ريحتك ومش هتبقي ساكتة الا معاكي انتي، وساعتها انتي اللي هتتحايلي علي اي حد يخدها منك شوية».

وقالت نورهان في تعليق آخر: «دا اكتئاب بعد الولادة فانتي حاسة كدا ودي مش حقيقة بنتك ليكي في الآخر مهما حصل واي قرار يخصها ليكي انتي وبعدين احمدي ربنا ان حماتك بتحبك وبتحب بنتك، وبنتك هتكبر بتحبك وبتحب جدتها ايه المشكلة!!».

وعلقت مها: «بنتك وانتي مامتها مهما هتحب جدتها هتحب مامتها برده، ربنا يبارك في جدتها وفيكي ومتزعليش في ناس نفسها يبقى عندها حد يساعدها».