أثارت البلوجر الكويتية الشهيرة، روان بن حسين، جدلًا كبيرًا بعد منشورها على أحد مواقع السوشيال ميديا، والذي تسبب في غضب الكثير من الرجال والنساء منها، مع اعتبار كلامها إهانة مباشرة للرجال؛ حيث قالت روان في منشورها: «الراجل زي الشغالة في أي دقيقة يمشي، لازم تعتمدي تعملي كل حاجة لنفسك».

وتابعت روان بن حسين: ««لا شيء في الدنيا يبقي لكِ لا حبيب ولا راجل ولا حتى أبوك وأمك، اللي يبقى لك شهادتك ومركزك في المجتمع؛ لأن الحياة عبارة عن غابة لا تاكلي يا تتاكلي».

وعلى الرغم من شعبية تلك البلوجر الكويتية وحب الكثير ومتابعتهم لها، إلا أن التعليقات كانت مهاجمة لها بشكل كبير، وعلقت ريم: «تشبيه مش محترم لا الراجل ليه أمان ولا الست ليها أمان، الأمان من عند ربنا الواحد يجتهد ويصفي النية وربنا يكرم الجميع، كل واحد بيتكلم من ظروفه وكل واحد بيشوف صح بيكون مرّ بالظروف ده والعكس طبعًا كل واحد ظروفة غير التاني».

وعلقت ميرنا: «بغض النظر عن التشبيه بس كلامها صح»، وقالت نسمة في تعليق آخر: «مع أن الواحدة تعرف تعمل كل حاجة مع إنها تعرف حقوقها إيه اللي ليها وإيه اللي عليها عشان متتحولش للذكر».

كما قالت رضوى: «هو لازم علشان أثبت نفسي أغلط في الطرف التاني ليه وأقلل منه؟؟ هو إحنا مش داخلين حرب بتتكلم بلهجه فيها حتى تقليل على الأهل دي ملهاش خير في حد! وبعدين أنا مش فاهمة هي شايفة نفسها على إيه! وإيه المفيد اللي بتقدمه للمجتمع؟!!».

وانتقدت شيرين المنشور قائلة: «إيه زي الشغاله دي، معقولة العلاقات الزوجية بقت بالسطحية دي، نظرة خاطئة طبعًا مش عشان الرجالة مش بتخون بس التشبيه نفسه مينفعش يتقال للزوج أو العكس مينفعش يقول أنا شايفها خدامة، ومش المفروض الجواز عشان حد يعملي اللي معرفش أعمله».

وعلقت ميرنا قائلة: «أنا أصلا بحبها بس متعاديش حد اهتمي بنفسك عشان إنت أهم وفي نفس الوقت متنسيش مسئولياتك تجاه اللي حواليكي».

وقالت داليا في أحد التعليقات: «لا طبعًا ولا شغل باقي ولا حاجة باقية بس إحنا بنعمل اللي علينا والباقي تيسير من رب العالمين. الزواج ده سنة من رب العالمين مفيش فلوس هتعوض الحنية والحب. بلاش أفكار الغرب اللي عايشين حياتهم أصلا بالطول والعرض وأصلا مش بيستغنوا عن الرجالة في حياتهم بجانب شغلهم. اختاروا صح وحافظوا على نفسكم واللي ربنا كتبلها وتشتغل وتنجح وتتزوج وتفتح بيت وأولاد مش تفكر مرتين».

وأضافت: «عارفه كام واحد معاه شهاده ومش شغال. مركز إيه اللي في المجتمع مركز لمَّا تربي أولاد صالحين في المجتمع ده وده أكبر نجاح. اللي بتتكلم دي بتتكلم بمنصب أبوها وفلوسه وغير كده مكنش حد سمعلها صوت أصلا».