«فسيخ زبدة».. السيدات على سوشيال ميديا الخميس: «هنطبخ إيه بكرة؟»

ولكن كانت الأحاديث للنساء اليوم حول وجبات الطعام والطبخ الذي يتم تحضيره يوم الجمعة، حيث أن ذلك من أهم ما يمكن للمرأة عمله لتسعد أفراد أسرتها خلال يوم العطلة.

ونشرت إحدى السيدات تتساءل على "فيس بوك": «يا جماعة ايه ممكن يطبخ بكرة الجمعة ويكون حاجة سهلة وفي نفس الوقت تحفة كدة وتفتح النفس.. محتارة جدا».

وعلقت أمل على المنشور: «تبلي فرخة من دلوقتي سويها بكره إن شاء الله في الفرن واعملي معاها رز بسمتي».

وقالت عزة: «تحفة تفتح النفس مفيش غيره فسيخ زبدة مع بصل وليمون وعيش، وبعدها كوباية شاى بالليمون كل جمعة وأنتي طيبة».

وعلقت جيهان: «أحلى حاجة مكرونة بشاميل مع نواشف زي الكفتة أو الفراخ المحمرة أو الكبدة وممكن تعملي كبدة إسكندراني مع مكرونة وممكن أسماك وممكن طاجن رز معمر مع كفتة مكرملة تحفة وممكن سمبوسة محشية جبن ومفروم وخضار مع ملوخية خضرا ورز أبيض فريش ممكن مكرونة وايت سوس أو باستا مع صدور فراخ مشوية أو متبلة مع فلفل ألوان ..الأفكار كتير بس علشان الجمعة لمة العيلة اسأليهم نفسهم في ايه واعملي لهم».

وقالت سلمى: «سمك مشوي بيتجاب جاهز ومعاه طبق رز ابيض لو انتم اتنين بس الطبق اللي بـ ١٥ جنيه بيكفي وبزياده كمان واعملي جنبهم طبق سلطة خضرا بالبصل وسلطة بابا غنوج و بالف هنا يا ست الكل يوم الجمعه ده يعني سمك معروفة وبيكون إجازة من كل حاجة».

كما علقت أية: «رز بسمتي وشيش او فراخ مشويه مكرونه وايت صوص بالفراخ كله في بعضه مش بتاخد وقت وكفته مع مكرونه ريد صوص وبطاطس مثلا، وممكن فراخ مشويه وجنبها عيش ومخللات و طحينة وسلطة».

وقالت سماح: «طاجن خضار باللحمة وجنبه طاجن رز معمر وكله يتحط في الفرن يستوي مع بعضه راحه وأكلة حلوة».

وعلقت دعاء قائلة: «حسب مقدرتك وحسب عندك أي طاجن سجق شرقي بالبصل والفلفل والطماطم سمبوسه باللحمة المفرومة ومعاها مكرونه حمرا أو وايت صوص كفتة وعيش وطحينة وكاتشب وتوميه».