أخبارها سوشيال ميديا| «عمل إيه عشان تحبيه؟».. البنات ينشرن أسرارهن على الفيسبوك

أثار منشور جديد لإحدى الفتيات على "جروب" بموقع التواصل الاجتماعي "فيس بوك" ضجة وتساؤل بين الفتيات، وأيضا إعجاب بقصص الحب التي كانت ترويها البنات عن سر اختيارها لشريك حياتها.

وقالت الفتاة في منشورها متسائلة عن قصة الحب التي جمعت كل واحدة بنصفها الآخر والذي جعلها تقرر الزواج منه: «عمل ايه يخليكي تقولي هو ده؟».

وقالت هبة: «عمل كل حاجة وعكسها والله، اتغير من أكتر إنسان كنت بقول أنه لو السما انطبقت على الأرض دا مش ممكن أكلمه تاني أصلا وجه وقت كنت بكرهه فيه وشايفاه أكتر إنسان مش مسؤول وكداب وصفات وحشه كتير، لحقيقي أكتر إنسان مسؤول وشاطر ومجتهد وراجل وقد كلمته وبيحافظ على نفسه وعلى اللي معاه ومريح في الدنيا بجد، ربنا يعينه يا رب ويقويه ويهديه ويقدره ويكملنا على خير يارب».

وعلقت يسرا قائلة: «هو من غير ما يعمل أنا حسيت إن هو ده، بس اتأكدت لما لاقيت فجأه اليوم مش بيعدي غير بوجوده، بيخلي باله مني أكتر مني أنا شخصياً، وأكتر حاجه بقا أنه عرف يتعامل ببساطته مع كل اللي جوايا يعني عرف يتلامس مع أعماقي، حسيت أنه هو ده اللي استنيته وحلمت بيه سنيين».

وقالت فاطمة في تعليقها: «24 ساعة مشاكل وخناق بس مش بنقدر نستغنى عن بعض، أول لما بشوفه لو مبهدلين بعض بنسى أي حاجة».

وعلقت رضوى: «أكتر واحد بيشجعنى وببتحمس لأي قرار باخده بيعرف يضحكني وبيحتويني مهما عملت عمره ما اتضايق من تصرفاتي ولا حتى عاتبني عليها بالعكس كان شايف عيوبي حاجات عفوية وطفولية يعني إني بتكلم بسرعة ومتسرعة في قرارات ساعات بعمل حاجات عبيطة بيشوفني طفلة صغيرة مش إني ست كبيرة وبتاع مكنش بيزعقلي ويكرهني في عيشتي زي غيره بجد مكنش مخوفني منه أنا بحبه من 14 سنة في السنين دي سيبته ورجعتله وسيبته ورجعتله وكنت برتبط على فكرة بس كنت بشوفهم عيال عقلي كان دائما بيحطه في مقارنة مع أى حد عشان كده يوم ما قررت اتجوز قولت هو ده وكل مرة برجعله فيها بلاقي مكانتي في قلبه بتزيد وكأنه مستنيني عشان يقولى معلش بس إتس أوكاي بيبي عادي إتس أوكاي هاتى البُكا وخدى البوكيه بجد».

وقالت آلاء في تعليقها: «اثبتلى ده بمواجهته لأي حاجة علشان نكون سوا بيحبني زي ما أنا بكل عيوبي الى أنا فعلا عارفاها ومعترفه بيها قدام نفسي، أي حاجه ممكن تهد علاقتنا بيسعى دايما أنه يغيرها للأحسن».