تمر الكثير من السيدات والفتيات بأيام متوترة، يكون فيها التوتر عنوانًا لليوم ولا يعرفن كيف يتصرفن لتمر تلك الأيام بدون توتر.

وتستعرض غادة كريم، لايف كوتش، عبر بوابة «هير نيوز»، 10 خطوات لتقليل التوتر اليومي.

يجب عليكِ تخصيص نصف ساعة يوميًّا لنفسك: "اشربي شاي بالفانيليا اشربيه في البلكونة واسمعي مزيكا، املي البانيو مياه سخنة باللافندر ولعي شمعة ومزيكا، يوم هتقدري ويوم هتنسي، ويوم هتبقى ساعة ويوم تاني خمس دقايق حتى، المهم إنك آخر اليوم عملتي حاجة لنفسك وبس".

لازم تخرجي مع صحباتك، مع جوزك لوحدكم، مع نفسك في الشمس وكتاب، تناولي فطارًا، ورحي سينما، اعملي شوبنج، أي خروجة تبسطك، خططي لها طول الأسبوع علشان تفضلي مستنية حاجة هتسعدك.

اهتمي بالقراءة مش مهم نوع الكتب إيه المهم تقرئي، مش لازم يبقى وقت مناسب ممكن وقت تمرين الولاد، وممكن عشر دقايق قبل النوم وممكن على الأقل صفحة في اليوم، القراءة بتخليكي مش مزنوقة في الشرابات والمحشي بتفتح عقلك على مناطق جديدة في الحياة، بتفصلك حرفيًّا.

يجب عليك متابعة مسلسل أو فيلم، "كفاية نكد خلي الأحداث فعلا تبقى لطيفة وتبقى نايمة وفي دماغك البطلة كانت لابسة إيه والبطل كان حلو إزاي والسفرية والأماكن مش لازم أكشن وتقطيع شرايين افصلي وشوفى حاجة خفيفة كوميدية أو رومانسية".

واظبي على أداء الصلوات وقراءة القرآن: "مفيش حاجة ممكن تخليكي أهدى قد التدبر والتسبيح والاستغفار والصلاة والدعاء المغربية أو الفجر".

لا بد من الاهتمام ببشرتك ويديكي مهما كانت الضغوطات مش لازم تنسي تحطي كريم على إيدك ووشك.

يجب عليكِ إعادة اكتشاف نفسك من جديد: "وإحنا بنكبر بنكتشف كان ممكن نحب حاجات جديدة لكن ماجربنهاش وفي دايرة الحياة المطحونة خلاص بنعمل إللي عارفينه وبس".

يجب عليك ممارسة تمارين التأمل هتفيدك كثير وهتقلل من التوتر: "شوفي فيديو عن التنفس وأهميته واتنفسي صح؛ لأن ده مهم حاجة بسيطة لكن فارقة في نفسيتك وجسمك جدا". 

 اعملى حاجة بإيدك بتحبيها؛ لأن الأعمال اليدوية بتسحب الأفكار السلبية وبتعلي هرمونات السعادة.

 

غيرى طريقة تفكيرك في أداء المهمات اليومية، بتوصلي ولادك المدرسة اسمعي مزيكا مش لازم تشتمي العربيات، قاعدة في التمارين اقري أو لفي التراك أو ارغي، بتطبخي اسمعي مزيكا أو كتاب صوتي مش لازم على السريع وانتى بتنفخي، هتذاكري مع ولادك أو تحميهم أو تنيميهم ممكن تبقي لطيفة مش لازم شخط وزعيق؛ لأن ده الوقت إللي هيفتكروكي بيه دايمًا لمّا يكبروا وهما هيكبروا أسرع من تخيلك.