أخبارها سوشيال ميديا| «عك» فيلم «أصحاب ولا أعز» ..وتريند والدة المدرس

كالمعتاد، شغلت بعض الترندات تفكير النساء على مواقع التواصل الاجتماعي اليوم، حيث تبادلن المنشورات والتعليقات حول واقعة حدثت وأثرت في الجميع عن امرأة رفضت خدمة حماتها وتسبب ذلك في طلاقها، ومن جهة أخرى شنت بعض النساء الهجوم على فيلم «أصحاب ولا أعز» مع نقد لاذع للفنانة منى زكي.

انتشرت على مواقع التواصل الاجتماعي قصة والدة مدرس يُدعى، أحمد ف، وهي تبكي وتشكو مما حدث مع زوجة ابنها عندما ظهرت ببرنامج «واحد من الناس»، الذي يقدمه الإعلامي عمرو الليثي، على فضائية «الحياة»، حيث أنها أصيبت بجلطة في المخ ورفضت زوجة ابنها خدمتها مما دفع ابنها أن يطلق زوجته. 

قالت رضوى في منشور: «جماعة بغض النظر عن أي حاجة بس ابنها ملزوم بيهم مش مرات ابنها مرات ابنها هتخدمه وتخدمها وتخدم أخته وتخدم بناتها الاتنين؟ مفيش شيء يجبرها علي كده اللهم في بعض الفقهاء قالوا خدمة الزوج نفسه مش واجبة في بعض الحالات، هو يخدم أمه هي مش ملزومة تخدمه ولما هو دكر كده وقادر يشيل ومستغني عنها وليه يطلق ما كان يسيبها عشان البنات ويخدمهم هو لوحده بردو، الموضوع ملوش علاقة بالتربية هي طاقة وصبر وقدرة احتمال هتعمل ده مجبرة بس من وراهم هتشتم فيهم غصب عنها لأنه مش عن طيب خاطر فيه ستات ربنا خالقها كده كويسة جدا بس ملهاش خلق تخدم كل دول يوميا».

بينما علقت فيروز:«ماشي عندك حق هي مش ملزمه لكن ليها علاقة بالتربية والأصل وواحده تستخسر في حماتها يبقى هتسخسر فجوزها وابنها».

وقالت شيماء: «كل واحد لي مقدرة أكيد هي شايفة حاجة احنا مش شايفنها ومفيش واحدة هتخرب بيتها بالساهل لي الهجوم إنها مش كويسة وبلا بلااا  ليه متقولش مش مستحمله تعبت عندها طاقه ونفذت اييييه».

وعلقت ندى: «مفيش حاجه اسمها كده بنت الأصول هى إللى هتخدم حماتها ومش اسمها تخدم اسمها هتساعد حماتها ده حتى من واجب الإنسانية  وهو أكيد مش هيرمي أمه عشان مراته بدل مراته مش هتقف جانبه تطلق لأني هى متستهلش راجل زى ده ربنا يبارك فيه ويجعله في ميزان حسناته».

بينما علقت زينب: «بيقولك لأجل عين تكرم ألف عين وأنا لأجل جوزي أشيل أهله كلهم في عنيا مش بس مامته.

وبعدين ده احنا الغريب بنشفق عليه ونحب نساعده في مش هساعد مامت جوزي اللي هي في مقام أمي! حقيقي قلة أصل مهما كان والدنيا دوارة بجد، والست ربنا يشفيها ويعافيها وابنها مغلطش، اللي ملوش خير في أهله ملوش خير في حد»

نشرت مريم عن فيلم أصحاب ولا أعز، وقالت: «فيلم قمة في الانحطاط، خمور وشذوذ، منى زكي في بدايته حذفت تاريخها بالكامل بعد هذا العك الفني أنا مش هتكلم على حد غير منى لأنها تاريخ ثانيا احنا مصريين ولينا عاداتنا مهما عملتو والله ماهتعرفوا تغيروا عادة فينا بنغير على بلدنا بنغير على الفن المصري وبنغير على أي حاجه يذكر فيها اسم مصر».

كما علقت أميرة: «الفيلم فعلا سيئ ونهاية الفيلم حاجة سخيفة وسايبها مفتوحة ومخدناش أي عبرة من الساعة ونص دول ليه منى عملت كدة وهي خارجة من نجاح ساحق في لعبة نيوتن وكذلك إياد نصار بعد ما عمل محمد مبروك في الاختيار والجماعة».

بينما علقت غادة: «جماعة بتتكلموا في إيه فيلم إيطالى اتعمل منه ١٩ نسخة بـ ١٩ لغة لحد دلوقتي، ودخل موسوعة غينيس أكيد مش بيمثل كل دولة أتعرض فيها ولا كل شعب اتعمله الفيلم قعد يحلله ويظيط كدا احنا بنموت في الظيطة، الفيلم نزل ! عجبك فكرته اتفرجى عليه، اتعارض مع مبادئك متتفرجيش، أو اتفرجى على نسخة أجنبية عشان متخديش الموضوع على وطنيتك أوى وتقولي اه دول أجانب عادى يعملوا اللي هما عاوزينه 

وهو ده بالظبط اللي الفيلم بيتكلم عنه، كلنا عاملين ملايكة بجناحات قدام الناس واحنا بنعمل كل حاجة غلط في السر».

بينما قالت سلوى: «مش معنى أنه واقع وبيحصل إننا نفضح الدنيا، مظنش إن الفن بيعالج أي مشكلة من مشاكل المجتمع بالعكس للأسف المجتمع في انحطاط أخلاقي عالي  جدًا وسبب رئيسي الفن».