4 أخطاء في تربية طفلك تجعله معتمدًا عليكِ.. «متخليهوش ابن أمه»

تقع بعض السيدات في أخطاء خلال تربيتهن لأطفالهن، تجعل الأطفال يعتمدون بشكل كبير على أمهاتهم ليصبح الطفل "ابن أمه"، لذلك يجب عليهن الانتباه.

وتستعرض الدكتورة غادة النحاس، استشاري تربوي، عبر «هير نيوز» 4 أخطاء في تربية طفلك تجعله معتمدًا عليكِ: "هتخليه ابن أمه".

يجب على الأمهات الابتعاد عن الحماية الزائدة، لأطفالهن: "متحميش ابنك حماية زائدة عن اللزوم علشان هيبقى ابن أمه وهيتعمد عليكِ في كل حاجة، ومش هيعرف ياخد قرار من غير مشورتك، اعرفي إن ده مش خوف على الطفل دا  بيؤذيه ومش بيديه فرصة يقع ويقوم ويتعلم ويقرر".

يجب على الأمهات الابتعاد عن فعل الأشياء التي يستطيع الطفل عملها: "متعمليش الحاجات اللي بيعرف ابنك يعملها، مترتبيش سريره، متشيليش شنطة مدرسته، لازم يتعود يعمل كل حاجة بنفسه طالما قادر علشان ميبقاش شخصية اتكالية، وعلشان هيبقى راجل مش متخيل أصلًا إنه مفروض يعمل متطلبات الحياة العادية لنفسه".

يجب على الأمهات الابتعاد عن حل مشاكل أبنائهن بشكل مبالغ فيه: "ما تحليش مكانه الخناقات ولا الواجبات، ما تصلحيش مكانه غلطاته، ولا تحلي مكانه خناقاته مع أصحابه سيبيه يحل ويفكر ويشوف المشكلة حصلت ليه ".

ابتعدي عن مكافأة الطفل طوال الوقت: "متكافئيش ابنك على الفاضي والمليان، ما تنفخيهوش على الفاضي، أكيد بنشوف ولادنا مميزين في عينينا دايمًا بدافع حبنا ليهم لكن لازم مننفخهومش وخلاص بدون داعي".