«كيف أخفف عن خطيبي ضغط الشغل؟».. مناقشات البنات بعد «الدبلة»

فترة الخطوبة من أجمل المراحل التي تمر على الشباب والبنات، فيكون كل طرف منهما يحاول أن يسعد الآخر ويقترب منه حتى يستعد كل منها لأن يشارك الآخر حياته، ولكن تكثر الخلافات وعدم القدرة على التفاهم في تلك المرحلة، بسبب كثرة الضغوط التي تقع على عاتق الشباب من أجل تحضير منزل الزوجية.

وجاءت إحدى المناقشات الإيجابية خلال فترة الخطوبة من قبل فتاة على جروب البنات على "فيس بوك"، تتساءل عن طريقة للتخفيف عن خطيبها من ضغط العمل والمسؤوليات، وقالت في منشور: «ازاي بتخففي عن خطيبك ضغط الشغل خصوصًا لو شغله صعب ومرهق ومش فرحان فيه؟».

وكانت التعليقات من الفتيات إيجابية بشكل كبير تدل على النضج والتفاهم وقدرة المرأة على مساندة الرجل في أصعب الظروف، حتى يمكن أن تصل لمنزل الزوجية مع شريك حياتها بتقدير منها لمجهوده وتعبه في بناء هذا المنزل.

وقالت نور في تعليق: «اتكلمي معاه في حاجات بيحبها قوليلوا أنه مش هيفضل فيه علطول وإن هيكون فترة في حياته وأن الجاي أحسن واتكلموا وتخيلوا مستقبلكم وقوليلوا إن أنت هتكون حاجه كويسه والحمد لله أن في شغل دلوقتي وفلوس نصرف بيها، حتي لو مصاريفه هو في ناس قاعده مش بتشتغل، اتكلمي عن الحاجات اللي بتفرحه ابعتيله رساله حلوة وهو في الشغل لما يخلص يتبسط بيها واتكلمي دائما معاه عن الحاجات المميزه فيه».

وعلقت بسنت قائلة: «ببطل زن عليه بسيبه لما يرجع من الشغل ينام بقوله حاضر وبفضل أهون عليه بكلام زي كله خير أكيد ربنا هيكرمك كلام من ده مش بضغط عليه في كل حاجه».

وقالت جيجي في إحدى التعليقات: «حسسيه إنك فرحانة أنه هو بيشتغل وكنتِ طول عمرك تتمني إن تتجوزي واحد زيه تعبان في فلوسه، دائما ادعيله ربنا يصلح حالك ربنا يعينك ربنا يرزقك ويعطيك من فضله وكرمه وعظمته، ربنا يعينك عشان نبقى في بيت واحد كده يا حبيبتي ربنا يخليكم لبعض ويسعدكم العمر كله».

وعلقت إسراء قائلة: «كنت بتكلم معاه أن لازم البداية تكون كده عشان نوصل لحاجه أحسن لازم نمر بـده، وبحمسه وبسأله نفسه يعمل إيه أو يحقق إيه ونتكلم، بيتحمس وبيستحمل شويه الضغط وادعيله كتير، سبيله رساله الصبح قبل ما يروح الشغل يقراها يكون فيها دعم وإنك فخوره بيه والكلام ده».