حوادث

بكلمات مؤثرة.. نشوى مصطفى تتنازل عن محضر التحرش بابنتها

الإثنين 01/نوفمبر/2021 - 01:46 م

محمد على

كشفت النجمة نشوى مصطفى، في بوست على صفحتها بموقع التواصل الاجتماعي فيسبوك، عن تنازلها عن قضية اتهام عدد من الأشخاص بالتحرش بابنتها، أثناء قيادتها برفقة زوجها واثنين من أصدقائها سيارة ملاكي على طريق كوبري المنصورية - الهرم بمحافظة الجيزة.

وقالت نشوى مصطفى عبر صفحتها على الفيس بوك: "الحمد لله تم القبض على العربية باللى كانو فيها فى أقل من أربع ساعات، للأسف كلهم سنهم صغير، والهدف اتحقق إنهم هما وغيرهم عرفوا إن مصر اختلفت وكله متسجل وإن عندنا عنين صاحيه بتحمينا ومحدش فوق القانون".

العفو عند المقدرة

وأضافت: "يمكن آخر سطر ده يزعل بعض الناس اللى طلبوا منى إنى استمر في القضية، بس حرصًا على أمهات وأسر المتهمين وانهيارهم بأن ولادهم يتسجنوا.. أنا وابتغاء مرضاة الله، تنازلت عن القضية عملاً بمبدأ العفو عند المقدرة، ربنا يهديهم، كل اللى طلبتو من أهاليهم وهما بيعتذروا لبنتى إنهم يربوا عيالهم ويفهموهم معنى الرجولة".

واستكملت مصطفى: "أقل عقوبة للمتحرش باللفظ أو الإشارات الخادشة للحياة هي 5 سنوات طبقاً لقانون التحرش اللي أمر بتعديله الرئيس حفاظاً على حق بناتنا.. حاجة تانية مهمة مكنتش اعرفها.. أنا بالمناسبة معملتش محضر.. أنا بس كتبت بوست هنا، واللي اتحرك بالنيابة عني كمواطنة مصرية هي إدارة الرصد والبيان والتوجيه بمكتب النائب العام، ودي إدارة موجودة مخصوص لمتابعة السوشيال ميديا، وبيهتموا بأي مشكلة يكتبها أي مواطن وليهم أرقام تليفون نقدر نتواصل معاهم".