كلام ستات

"الزوج الندل".. إيمان هجرها زوجها بعد إصابتها بالروماتويد

الثلاثاء 12/أكتوبر/2021 - 08:01 م

عزة ذكي

لم تتوقع الزوجة الأربعينية أن يهجرها زوجها بعد زواج دام لـ18 عامًا، بعد اكتشاف إصابتها بالروماتويد وهو التهاب الأعصاب الذي أفقدها القدرة على الحركة وممارسة مهام يومها كالسابق، وما ان اكتشف الزوج إصابتها بهذا المرض إلا وتركها وتخلى عنها ولم تعرف شيئا عنه.

بداية القصة

"اتجوزته 18 سنة وخلفت 4 عيال، ومن 3 سنين صحتى وهنت وضعفت ومبقتش أقدر اشتغل زي الأول، وجه عليا وقت مقدرش اتحرك، وكشفت كتير دون تشخيص واضح، إلى أن شخص طبيب حالتي بأنه مرض الروماتويد، اللي خلاني فقدت القدرة على الحركة، وبعد ما جوزي اكتشف إني تعبانة وخلاص مبقدرش أقوم بواجباتي اليومية مشي وسابني من 3 سنوات ومعرفش عنه حاجة، ولا بيصرف علينا، فاضطريت انزل للشغل علشان أساعد ولادي في مصروفات البيت".

الزوج الندل

لم تتوقع الزوجة التي أفنت 18 عاما من عمرها في خدمة زوجها وبيتها، وكانت جنبا إلى جنب مع زوجها، أنه سيتركها ولم يستكمل معها مسيرة الحياة: "مكنتش متخيلة إن آخرة خدمتي جوزي يسيبني ويمشي ويبقى ندل، ما انا تعبت من كتر الشقا، مش جاية من عندي أهلي تعبانة، لكن الحمدلله ربنا أكرمني بناس دفعت حق علاجي الطبيعي وأدويتي وبدأت أتماثل للشفاء، ومن فترة بسيطة عرفت أن الزوج الندل اتجوز في منطقة تانية، وسايب عياله الـ4 مش بيصرف عليهم".

الإرادة والعزيمة

بإرادة وعزيمة استطاعت إيمان التغلب نسبيًّا على المرض وبدأت تتحرك لتستعيد صحتها وجزءًا من نشاطها مرة أخرى، نادمة على كل هذه السنوات التي قضتها مع زوج لم يشعر بقيمتها: "كنت متحملة اللي بيعمله فيا، وكنت حاسة إني ست عايشة في الدنيا كدة وخلاص بلا هدف مكنش محسسني إني ست كنت خدامة وخلاص وأول ما ربنا اختبرني في صحتي باعني خدني لحم ورماني عضم، بس ربنا عوضني وخلاني أحسن من الأول ولما نزلت اشتغلت حسيت إني ست وليا قيمة، وحسيت إن عمري معاه راح هدر وبدون فايدة، رغم إني كنت جنبه ولم اتركه وعافرت معه لأجل أولادنا".

لا تتمنى السيدة الأربعينية سوى أن تتخلص من هذه العلاقة السامة: "بتمنى من ربنا أنه يرجع علشان أخلص منه يطلقني ويريحني، أنا وأولادي مش محتاجين ليه؛ لأنه سابنا في عز احتياجنا، فمبقاش يلزمنا، ولادي كبار وفاهمين وبيقولوا مش عاوزينه".