فن وثقافة

أحمد سعد: "لأول مرة أحس إني مرتبط.. وزوجتي مش رخيصة"

الخميس 30/سبتمبر/2021 - 09:00 م

عبد الرافع علي

قال أحمد سعد عن زوجته الجديدة علياء بسيوني: "حسيت إني أول مرة أرتبط، وده بسببي أنا، في حاجات كتير في حياتي ما عملتهاش، عملتها دلوقتي، وكنت دايمًا ناقم عليها ورافضها، ما كنتش بعمل حاجات الناس الطبيعية لكن مع علياء عملتها؛ بسبب السن والاختلاف".

مفيش أحلى من العرف

وتابع حديثه، خلال لقاءئه ببرنامج "90 دقيقة"، الذي تقدمه الإعلامية بسمة وهبة عبر فضائية "المحور": "كنت ناقم على الخطوبة وقراءة الفاتحة والشبكة وإننا ننزل نجيب العفش مع بعض، والحاجات دي.. طول عمري ببص على الحاجات دي إن اللي بيعملها ناس قديمة، لكن اتضح لي إن أي حاجة لها علاقة بالعرف ليها أسباب، ومفيش أحلى منها".

اتغيرت

وأضاف: "بعد ما كنت شخص مهرجل بقيت أخاف إن حد يدوس بالجزمة على السجادة؛ لأني تعبت فيها واشترتها وفرشتها وفضلت واقف بعيد عشان أشوف شكلها، وشاركت مع علياء في كل تفصيلة، وبقيت أخاف أزعلها لأنها ما كانتش رخيصة وغالية جدا في كل موقف بيننا، تفاصيل الحياة بيننا ما كانتش مقلوبة وكانت زي ما بتحصل في أي حياة طبيعية".

علياء بسيوني

من جانبها، قالت علياء بسيوني زوجة أحمد سعد: "أول ما عرفته وقالي هنتجوز ونقعد في الفيلا وبعدين نعملها زي ما إحنا عاوزين، قلت له هنقعد في شقة صغيرة نفرشها براحتنا".

زيجاته الثلاث

واعترف سعد بأن سمعته سيئة عند الجمهور بسبب ما حدث في زيجاته الثلاث السابقة من أم أولاده والفنانة ريم البارودي والنجمة سمية الخشاب، وقال: "أنا الناس واخدة عني فكرة من ساعة المشاكل اللي حصلت وأنا متصالح مع ده جدا؛ لأني بشوف اللي بيتكتب عني، الناس لو كتبت اسمي بس على جوجل هتشوف كل حاجة، أنا صلحت من نفسي لأني في كل المشاكل اللي فاتت كنت أنا المشكلة فيها.. أنا اسم على الفاضي يا بسمة والله".

وتابع قائلا: "عشان أقدر أتقدم في حياتي ما بقيتش أشوف مشاكل في حد تاني، بقيت أشوف عيوبي أنا بس، عيوب الآخرين بتاعتهم، عشان أقدر أرتقي بنفسي، لكن ما ينفعش أبقى عايش في مظلومية وشماعة".

وكشفت علياء بسيوني، عن تفاصيل بداية علاقتها بالفنان أحمد سعد، موضحًة أنهما تقابلا في صالة الألعاب الرياضية، ثم تطورت علاقتهما ولم يتوقع أحد من عائلتها ارتباطها به، مشيرة إلى أن أخاها من وافق على علاقتهما، ثم أصبحت علاقة أحمد بعائلتها جميعا جيدة للغاية.